መሰላላም እት ገቢል ትግሬ

ዲበ ዲብ ሰነት 1910 እብ ኤኖ ሊትማን ወነፈዕ ወድ ዕትማን ለትከተበ እግል ዓዳት ወአድጋማት ትግሬ ለከምክም ክታብ፡ ዮምመ ምነ እት ገጽ 200 ዕልብ 105 ለህለ እብ ሰበት መትሰላላም ገቢል ትግረ ለከስስ ጽበጥ ህለ። እሊ ህዬ ለቀደም ምእት ሰነት ለዐለ ገቢል ትግሬ ሕድ ዲብ ልሳለም ሚ ልብል ዐለ ኣመሮት ምህም ሰበት ቱ፡ ምን እሊ ለተሌ ጽበጥ እግል ንፍሀም እንቀድር። ከአሰልፍ ገቢል ቅብለት እብ ከአፎ ሕድ ልሳለሞ ክም ዐለው እግል ንርኤ፡
ዎሮት ምን ገበይ ረያም ዲብ ዐድ ብዕድ መ እት ገሌ ሰብ ግሱይ ክም መጽአ ለልብለ ሰላም ወህቶም ለበሉሶ እቱ፦
1. = ሰላም ወዐለይኩም
2. = ዐለይኩም ወሰላም ምን አየ
1. = አነ በዲር ምን ዐጄ ቱ ወአዜ ምን እሊ ዘነቤነ
2. = ሚ ተስእሉነ? ሚ ደግሞ?
1. = ሴመ እምበል ደሐን
2. = ደሐን ትብዘሕ እንሸአለ፡ አርድ ምኑ መጽአኩም ሚ ደግሞ እቱ?
1. = ሴመ ከላፍ አለቡ
2. = ምን አሽናክ ሚ ትርኡ ወትሰሙዕ
1. = ደሐን ሌጠ መለሀየ ተሀርስ አለቡ። እንቱም ሚ ተአስእሉነ።
2. = ክሉ ደሐን ነበሽ አለቡ፡
አክባር ሚ ትርኡ ወትሰሙዕ?
1. = ደሐን ወሰላም ሌጠ
2. = አርድ ምኑ መጽአኩም ሰብኡ ወማሉ እኩብ ቱ ማሚ፡
1. = ሓይሶ ኣለቡ፡
2. = ኖስኩም ስልምት ተ ማሚ?
1. = ሰኔቶም ርኤነ እንቱም ሰኒ ነበርኩም ማሚ?
2. = ሐምዲልለ ሰኔቶም ርኤነ፡ ኖስኩም ዑፉያም ወጽሩያም እንቱም ማሚ?
1. = ጸሮቶም ወዓፍየቶም ርኤነ እንቱም ሰኒ ዐልኩም ማሚ?
2. = ሰኔቶም ርኤነ እንቱም እለ እንቱም ማሚ?
1. = ሐመድናሁ ወሸከርናሁ ኖስኩም ሚ ትመስሎ?
2. = ረቢ ሐመድነ ጼዋይትኩም ስልምተ ማሚ?
1. = ሐይሰ አለቡ እት ሰኔት ልወስከ፡ እንቱም ማልኩም ወአዳምኩም እኩብቱ ማሚ?
2. = ሴመ ሸር አለቡ ንኡሽ ወዐቢ ሚ መስል?
1 = ክሉ ደሐን ረቢ ሐመድነ።
2 = ዐድኩም መአዜ ሐደግኩሞ
1 = እለ ሳልስነ ዮም ተ።
መሳላም አግደ ዲብ ምድር መንሳዕ 1 = ሰኒ ዐልከ?
2 = መዓልከ ልስኔ አሰናይ ደሐን መጽአከ?
1 = አሰናይ ደሐን ጸንሐከ።
2 = ምን አየ እንተ?
1 = ምን ከረን አነ።
2 = ሚ ትዳግም?
1 = ደሐን ሌጠ።
2 = ደሐን ትብዛሕ እንሻኣለ።
ሰኒ ነበርከ ማሚ?
1 = ሰኔትከ ርኤኮ።
2 = ዑፉይ ወጽሩይ እንተ ማሚ?
1 = ሐምዴ እግሉ ሰኒ ህሌኮ?
2 = ጼዋከ ወማልከ ከእፎ ህለ?
1 = ሐምዴ እግል ረቢ ክሉ ደሐንቱ። እንተ ሚ ትመስል?
2 = ሴመ ሸር አለብዬ ሐምዴ እግሉ። እንተ ህዬ እኩብ እንተ ማሚ?
1 = ሴመ ከላፍ አለቡ ሰኔቱ ርኤኮ።
2 = ምኑ መጽአከ ክሉ ደሐንቱ ማሚ?
1 = ክሉ ደሐን።
2 = ደሐን ትብዛሕ እንሻአላ።
ሚ ትዳግም ምን አሽናክ፡ ሚ ትርኤ
ወሰምዕ ምድር ሚ ትደገም እቱ ሐዳስ።
1 = ሴመ እምበል ደሐን።
2 = ደሐን ለሀቡከ ዐንሰበ
ዛልምቱ ወእክሉ ባቅልቱ ማሚ?
1 = ዛልምቱ ወእክሉ ሐይሶ
አለቡ፡ እት ሰኔት ልወስኮ።
2 = በል ዎ እብ ዕመም ዱለት ሚቱ አክበረ?
1 = ዕጬይ ኢትባትኮ ትቤ፡
እምበልሀ ላተ ኩሉ ደሐንቱ እለ ሰምዐኮ አለቡ።