መስሎሊብ

ምስሎሊብ፤

ምስሎሊብ /ሽዕር ሚ በሀለት ቱ፤ ምስሎሊብ በሀለት፤

ኦሮት ክፈል ምን ሕላይ ቱ።ዎ ሕላይመ ቱ እግል ኒበል እንቀድር። ሰበቡ ሀዬ፣ሰልፍ ምስሎሊብ ተአፋግር ዎክ ወዝን ሽዕር ተአፈግሮ።ዎ ሐር ለሐን(ዜመ) ተሀዬበ ዎ ሕለዬት ትገብእ።

ወእበ ለእለ ከትበ ዐልከ ቀርአከሀ ምን ገብእ ምስሎሊብ ተ። ዎ ምስሎሊብመ፣ካኣፎ ክም ትቀርኦ ገበይ ናዩ ቡ።

ከ ምስሎሊብ ከትብ እት ሀሌከ፣ ለቃለት(ከሊማት) ዎክ ለታመት ሕስበትከ እት መከለሲ፣ እብ ሕድ ለመስል ቀል እግል ትድበእ ዎክ እትከልስ በ።

ዎ ኣክለ ለሐን ቀያርከ፣እትቀይር ብከ እትመከለሲ።

ኣነ እብ ከምሰል እሊ ገበይ እሻርሖ።

ወ ደሐንኩም!

ስርበብኪ ነስኤኒ።

1/20/25

ልገት በሐር እንቲ ወ፡ ሎሆይ ሎሎ ጃሃራይ

ብክር ኣዳም እንቲ ቃዲሙ ወሓራይ

ሰዐር ሓጋይ እንቲ ለዕጾ ሳትራይ

ምልሕጣ ቀይም እንቲ ስባቅ ሸግራይ

ሰዐር አውል እንቲ መቃር ከድራይ

ጼና ኣዳም እንቲ ብክር ስራይ።

ምራዬት እንቲ ለግርመት ትሽህዲ

ዐጀብ እንቲ ወ፡ ሽፋ ወለት ሹም ወ፡ አፍንዲ

ቀመም ዝቡን እንቲ ለሀነን ልብል ናይ ህንዲ

ልብዬ ነው ቤላ ሚ ኢደኪ ኣናዲ፧

እተርህ እትመዬ ክም ሎሆይ ወርሕ ዔተርብ ለዕዳዩ ኢፋዲ

ቃላ ዐውልኪ እግል እድፋዕ እትኪ ሰላዲ

በዳ ተባብዬ ለዐጣል ጸዓዲ

እብ ወረዛዬ ሀለኮ(ህለኮ)እላ ኣና ኢሃዲ

አውሄለኮ ዲብ መክተብ ዳይና፡ ወ፡ ቃዲ

ክሉ ጀረብክዎ እመስል ሐቴ ኢዋዲ

አክር ስርዕ ጠላቅኮ ወ ፡ንቡር ቤት አብ ዐዋዲ

ድላ ሐልፈት እትዋለብ ክም ጅህል ራዲ

ላከፍክዎ በለሊት ለሕሹም ሰማዲ

ሰር ብራቁ ገብኣኮ ክም “አቡዬ” ጋንዲ

ኢቅብነቼ ፡ ኢሓሰ፡ እንዴ ለእደይኪ ኣማዲ

እግል እምሓል ሽዕርዬ ፍናን ክም ኢኮን ወዝንዲ።

እላ ሕለት (ሽዕር)እላ እት 11/24/2004 ህግያ ትግሬ ክም ሰፋለልኮ ለከተብክዋ ታ። ሑድ ወሰኮ ወ ፡ገሌ ቀያየርኮ እታ ። ተርጀመት ዎክ ፈረጎት ገለ ቃላት እትላ ሽዕር ናቅሞም ለሀለኮ እሎም ለተሉ ቶም። ኢትቃውዎም በስ እግል ፊቃዶ እከርዮም ሀለኮ።  “ሎሎ” ባርህ ፡ ዳምቅ፡፡(bright) “ምልሕጣ” ጥዑም ፍሬ ከደን ቱ ። እብ ትግርኛ ምልዖ ልቡሎ።ወ፡ እብ ብሊን ተረንኳ (ተርንካ) ልቡሎ) (Ximena afra) “ትሽህዲ” ሻሁድ፡ ሰማዕ። “መቃር” ኦር ጅንስ ሰዐር ሽከር (ስከር) ለልጥዕም ዲብ ረወሪት ዎክ ግልብ (cliff) ለበቅል ሰዐር ቱ። “አውሄሌ” እንሰር ወኬን ፡ ለዐል ወተሓት።” ኢቅብነቼ “ሓሻዕ ፡ ኢፋልዬ ፡ በዐል እሊታት ኢኣና፡፡ “ዕጾ”( famine) ሰፍራ፡፡ “ዝቡን” ቃሊ።” ተባብ” ርዝቅ፡ በሃይም (ሔዋናት) ክም ኣሓ ፡ ዐጣል፡ ኣባግዕ፡ እንሳ ፡ ወ መዓስረት( መዓስረት በሀለት ኣዱግ፡ ኣብቁል ወ ኣፍሩስ) እሎም ኩሎም “ ተባብ” እንብሎም ። መን ኣምር ዲብ ሰምሀር ዎክ ባርካ ምንድሊ ለእግሉ ነቃምኮ በናቢን ናይ ሕበር ኣስማይ እግል ለሀለ እሎም ቃድሮ ከአመሮቱ ሰኒ ቱ። ወሓር እትላ ዔላና ንዕለዮ።