ሰኒ ማይሳም

ዲብ ትግራይት፡ ሰኒ ምዩያም (ሙያም)፡ ሰኒ ጻብሓም፡ ሰኒ ውዕላም ሰኒ ማይሳም፡ ሰኒ እስሙናም፡ ከፎ ህሌኩም ወለመስሉ ምስል ወቅት ለገይስ ርዙቅ ከሊማት ህለ እግለ። እሊ ምን ገብኣቱ ህዬ ለዲብ አስመረ እት መደት እስትዕማር እብ ትግራይት ትትሃጌ ለዐለት ሬድዮ ዝያደት ትትአመር እበ ለዐለት ስሜት ክርስ “ሰኒ ማይሳም” ለትብል ተ። ሰኒ ማይሳም ለትበሀለት እቡ ህዬ ምን ገጽ ምሴ ትጠለቅ ሰበት ዐለት፡ መቀድማይ በርናምጅ ሰኒ ማይሳም እግል ሊበል ጠቢዒቱ ወአማኑቱ። ምን ገጽ ምሴ ሰኒ ማይሳም ትብል ዲኢኮን ሰኒ ጻብሓም ሰበት ኢልትበሀል።

ከእለ ሬድዮ እለ ለብዕደት ልእከተ እንክር እንዴ ከሬነ ዲብ ዐቦት ትግራይት ሚ ዶር ዐለ እግለ? እምቤ ምንገብእ፡ ለህተ ትቀድሙ በራምጅ ዓዳት ልግበእ ወሐይለት ትግራይት ዎሮ ምነ ምህም ክፋል በራምጅ ናይለ ሬድዮ ዐለ። ህቱ ሌጠ እንዴ ኢገብእ እግል ዐቦት ትግራይት እት ሰር ሰማንያታት ዎሮ መሕበር ጎማት ጋብእ ዐለ። ናይለ ወቀት ለሀይ ሱሕፊ ትግራይት ለዐለ ሱሕፊ አሚኔ ሀይሌ እግለ ዲብ ሰነት 2008 እብ ሰበት ዕግል ትግራይት ዲብ ዔማት አክባር እግል ልወጅህ እንዴ ትበሀለ ለጠበዐ ክታብ ጀህ፡ እግል ረሸዶት ናይለ እት መደት እስትዕማር እት አስመረ ለገብአ መሕበር ጎማት ወዲቡ ለትቀደመ ውራቅ ለከስስ ወሳይቅ ሃይብነ ዐለ። ከምነ ወሳይቅ ለሀይ ለአዳሌናሁ ጽበጥ እት በዓሙድ ዓዳት እግል ንርኤ ከእግል ዮም 1ይ ክፈሉ ታብዖ፡

ሬድዮ አስመረ (ሰኒ ማይሳም)

ትግራይት እት አክባር (ሐብሬ) እት ሰነት 1969 እት አስመረ ሐቴ እብ ትግራይት ለተአከብር ራድዮ እብ ንዛም አቶብየ ተአሰሰት፣ እሊ ራድዮ እሊ እብ ምስተዕምረት ለተአምበተ ምንማቱ ወሀደፉ እግል መስለሐት እስትዕማር ምንመ ዐለ፡ እግለ እብ ትግራይት ለልትአየሶ ላታ ክም ዐባይ ብሸራት ዐለት፣ እግልሚ እታ ወቀት ለሀይ እብለ ናይ ሰልፍ ራድዮ ትግራይት አምበለ እግል መስለሐት እስትዕማር ከድሙ ለዐለ፡ እግል መስለሐት መተንስየትመ ዶር ዐለ እግሉ፡ ለለአትፋጌዕ ወለለአደርስ በራምጅ ሰበት ዐለ እቱ፣ እታ ወክድ ለሀይ እብ ክሱስለ ዲብ ህግየ ትግሬ ሳድፍ ለዐለ ነዋቅስ ወመሐገዝ ከሊማት እግል አርተዖት ዲብ ዮም 15 ወ 16 ናይ ወሬሕ 12 ሰነት 1984 ዲብ ጃምዐት አስመረ እብ መአሰሰት ድራሳት አፍሪቅየ ለትነዘመ እብ ክሱስ ክለ ህግየ ትግሬ ሳልፋይ መሕበር ጎማት ጋብእ ዐለ፣ ዲብለ መሕበር ጎማት ለሀይ እብ ክሱስ ትግራይት ለለሀድግ 9 ለትፈናተ ወራቅ ቃርብ ዐለ፣ እሊ 9 ወራቅ እሊ ትግራይት እት ብሩር ወመዳይን ከፎ ህሌት? ክምሰልሁመ ነቅም ሕሩፍ ትግራይት እብ ሆሳባይ ኤፍሬም፡ ሐይለት ትግራይት ወተርጀመቱ እብ ሳሙኤል ናትናኤል፡ መስሉሊባት ትግራይት እብ ኢያሱ ኣሮን፡ ፍንጌ ሀገጊ ግእዝ፡ ትግራይት፡ ትግርኛ ወአምሐርኛ ለህሌት ዕላቀት እብ አማኒኤል ሰህሌ፡ ዲብለ ወቀትለ ለሀይ ዲብ በርናምጅ ሬድዮ ትግራይት (አስመራ) ልትነፈዖ እቡ ለዐለው ከሊማት ወሳድፍ ለዐለ አክጠኣት ወእግል ሰይሖቱ ለገብእ እብ አሚነ ሀይሌ፡ ወጸሃይቱ ሰለሙን፡ ትግራይት ዲብ ተርጀሞት ክታብ ቅዱስ ለአርኤቱ ዐቦት እብ ቀሽ አስፈሀ መሓሪ፡ ክምሰልሁመ አምሳላት ትግራይት ወመዓኒሁ እብ ሐዮት ትንስኤው ቃርብ ዐለ፣

ዲብለ እብ ክሱስ ትግራይት ለናቅሸ መሕበር ጎማት ምነለትፈናታ አካናት ወአሽቃል ለምጽአው 213 ሙሽተርከት ሓድራም ዐለው፣ ከእንዴ አትሌነ ምነ ዲብ 155 ገጽ ለትከተበ ጸበጥለ መሕበር ጎማት ለትናቀሸ ጭመም ምህምቱ ወእት አምር ትግራይት ሰዴ ለእምቤሉ እሊ ለተሌ እግል ንርኤ፡-

አሰልፍ ዲብለ እት ሰነት 1984 ለገብአ መሕበር ጎማት ትግራይት ምነ ዲበ ወቀት ለሀይ ዲብ ሬድዮ አስመረ ቅስም ትግራይት መዳልየት ወምቀድመት ለዐለው እብ ክሱስለ ዲብ ሬድዮ ለልሰመዕ አክጠኣት እብ አሚነ ሀይሌ፡ ለቀርበት ወረቀት ለጨመምናሁ ጽበጥ እንዴ አትሐጨርነ እግል ንርኤ፡-

ለእብ ክሱስ ሬድዮ ትግራይት አስመረ ለትቀደመት ወረቀት ዶል እንረኤ ለወረቀት ክእነ ትብል፡- “መበገስ አርእስ እብ ሰበት አክጠኣት ከሊማት አው ህዬ መትነፈዖት ዘዖታት ትግራይት ዲብ ራድዮ እብ ከአፎ ገበይ ክምሰል ልትሸረሕ ወለሳድፍ አክጠኣት እግል ሰይሖት ዲብለ በርናምጅ ለቀድሞ አንፋር ልግበእ መተንስየት ረአይ ወተስይሕ እግል ለሀቦ ዲቡ ለወጅብ ምንማቱ ታሪክ ናይለ ልትበሀል ካጥእ ከሊማት አው ሕስበታት ምን መዳልየትለ በርናምጅ ኦር- ኦሮ ረአይ ምንመ ለሀይቦ ዲቡ ለለዐይብ ኢኮን፣ አሰልፍ ቀደም 16 ሰነት ትግራይት ዲብ ሬድዮ እግል ልትሃገዋ ክምሰል አምበተት ዲብ እሊ ህዬ አክባር ወምህሮ ለለሀይብ በራምጃት አስክ አዜ ልትነሸር እበ ህለ፣” ትብል ለወረቀት፣

እግል መሰል ክመ ከም ክትፈት ሂጋ ትግራይት እንዴ ወዴነ ለንትነፈዕ እቡ ገሌ ከሊማት ዐረቢ፡ 1. ተላሚዝ ወሙደርሲን ሕኔት እምብል ተመሃሮ ወመምህረት ምን እምብል ለሐይስ

2. አዪ ፈስል ባጼሕ ህሌከ ሕኔት እምብል እምብል፡ አዪ ክፈል ባጼሕ ህሌከ ምን ልትበሀል ወሔሰ፣

3. አወል መረት ሕኔት እምብል፡ እብ መአምበት ምን እምብል ለሐይስ፡

ብዕድ እግለ ዲብ ከርስ ትግራይትመ ገሌ ፈርግ ዲብ ቃላት ወሐርፍ ህለ እግል መሰል፦

• ዲብ ምዴርየት በርከ ለነብር ሸዐብ፡ “ለሸይ ለእቡ ቀነጥኮ እሊቱ” ልብሎ፡ ዲብ ምዴርየት ከረን ለነብር ገቢል ህዬ “ለጋር ለእቡ ቀነጽኮ እሊቱ” ልብል፣

• እምበል እሊመ ምን ናይ ጋነ ከሊማት ለትወረሰ ህለ። እግል መሰል፦

ፌሮ፡ መኪነት፡ ሞቶር፡ ተለፎን፡ ማርቴሎ ወለመስሉ፣

ለካልኣይት ዲብ ሬድዮ ለሳድፍ ምሽክለት ናይ ተርጀሞት ተ፡ ዲብ ተርጀሞት ገብአ ምንገብእ፡ ዲብለ ገአት ትግበእ ሂጋ፡ ለሂጋ ከሊመት እብ ከሊመት እግል ትተርጅም ምን ጀርብ፡ ለዓም ጸብጠ ናይለ መውዱዕ እንዴ ፈሀመት እሊ መውዱዕ እሊ ለመተንስየት እብ ከአፎ ልፍሁሙ እንዴ ጌመምካ ዶል ተርጅሙ ዝያደ እግል ለአድሜዕ አው ለለተአሐዜ ርሳለት እግለ ለሓልፍ ቀድር፣