ሳራ ተ-ሰንበት - ፈናኒት

ፈናኒት ሳራ ተ/ሰንበት

ዮም 13/2/2014 እት እምባሶይረ ሆቴል ቱ፣ ሔልያይት ሳራ ተ/ሰንበት ሳልሳይ ሸሪጠ ተአድሕር ሰበት ዐለት። ክሎም እትሊ መጃል እሊ ለእዩሳም ወመሰጅዒን ወመግምለት ፈን አስክ ቃዐት እምባሶይረ ተንክሮ ዐለው፣ አናመ ክም አዳምዬ ዕዙም ሰበት ዐልኮ እንዴ ሸፈግኮ መጽአኮ፣ ክሎም ለዕዙማም ፋርሓም ወልዉቃም ርኤክዎም፣ ለሆቴል ወለአጥራፉ ፈን ፈን ጼኔኒ፣ አናመ ምን ጅወቼ ለውቀት ሰበት ሰምዐተኒ። እንበል ሰበብ ፍሽክ እቤ፣ በርናምጅ ተአንበተ፣ ሙቀድም በራምጅ ተውድሕ ክም ሀበ፣ አርእስለ ትደሐር ለዐለት ሸሪጥ “ዕዳጊልማ” ተሐሌት፣ አውጀሀት ፈናኔን ወመዳውረት ፈን፡ ኖር ሐየ ዲቡ፣ አናመ ባነ ሐሶሳይ ፈን ሰበት ትራኤኒ እተ መናሰበት ምን ሐደርኮ ሰኒ ትረይሐኮ ወትበሰጥኮ፣ ሐቆ እሊ ሐጪር ታሪክ ፈን ሳራ ትሸርሐ፣

ፈናኒት ሳራ ተ/ሰንበት እት ባካት ሐሊብ-መንተል ትወለደት፣ ሳራ ምን ንእሸ እግል ሕላይ ለትወለደት እት መስል እብ ሕላይ አብሀዘት፣ እብሊ ህዬ መጦር ድራሰተ 1ይ ሸሪጠ ክም አፍገረት፡ ሐቆሆመ ብዞሕ እንዴ ኢትትአከር 2ይ ክም ደግመት ወዮምመ 3ይ ሸሪጥ ክም ሰለሰት ትሸርሐ፣ ምነ ትደሐር ለዐለት ሸሪጥ እብ ሶት፡ ቪድዮ-ክሊብ ወኖሰ እት ተሐሌ ክም አዳወርነ፡ ምን ዐባዪ ፈናኔን ወሰብ ቅድረት፡ ክም ሔልያይ በረከት መንግስትኣብ፡ ሕጃይት ምንዳል፡ መሐመድ ዑስማን ወአሕመድ ሳቤ እብ ክሱሰ ልደሐር ለዐለ ሸሪጥ ወለመናሰበት ረአዮም ወበስጤሆም ሸርሐው፣ ረአዮም ወበስጤሆም ምን ሕድ ለሬመ ይዐለ፣ ናይ ክሎም ህዬ ዝያደት እግል ሳራ ለለኣትናይት ወአብሽርኪ ለልብል ዐለ፣ ሳራ እግል ፈን ቡልሕት ክምተ፡ ክም እሰረት መትባልሖተ ህዬ እስትሽሃድ እንዴ ደፈዕ እትለ ሕምድት ደረጀት ባጽሐት ክም ህሌት፡ ሳራ ምነ እት ፈን ወእብ ፈን ለነብሮ ወሕልሞም እግል ለሐቅቆ ለከድሞ ዕጹማም ሸባብ ክምተ፡ እብ ሰለስ ህግየ ሰበት ተሐሌ ህዬ፡ ሰለስ ነፈር ክምተ ውለመስሉ እግል ሽቅል ሳራ ዐውል ወሕሽመት ለለሀይብ ረአይ ወመስጤ ሀበው፣

እብ ክሱስለ ሸሪጥ። ‘ዕዳጊልማ’ ብሊን፡ ትግሬ ወትግርኛ ለከምክም 10 ሕላየት ለጸብጠ ሸሪጥ ቱ፣ ለሸሪጥ እሊ እግል ሳራ ባነ ዐውቴ ወተጠውር ለለአርኤቱ፣ ሰበቡ ህዬ። እት አርበዕ እስቲድዮ ለትነሰቀ ወ ለ ት ከ ሐ ሓ ቱ ፣ ብ ዝ ሓ ም ሸውዐረ ወሙላሕኒን ለአሸረከ ምን ገብአ። እብ ነደዳት ወሰፋየት ለትመለኣ። እብ ግርመት ለሐኑ፡ ቆናሁ አው መትሐላዋይ አክራኑ፡ መትመሳናይ ወልጥመት ሙሲቃቱ ወቪድዮ ክሊባቱ። ካልእ እብ ፍንቱይ ምነ መዳውረት ለዐጅበ አለት ሙሲቀት ዋጣቱ፣ ዋጣ እምበል እት ቆምየት ትግርኛ፡ እት ብዕድ ቆምያትነ ልሙድ ኢኮን፣ ፈን ላኪን አገረሞት ወጀዲድ ፍጥር አምጾት ሰበትቱ፡ ለገብአት ሙሲቀት ምስል ናይከ እንዴ አትመሳኔካሀ አተዮት አገረሞት እንዲኢኮን አክፍኦት ኢኮን፣ ሰበት እሊ ሔልያይት ሳራ ወሜክረተ እት ብሊን ወትግሬ ንፍዓም እቡ ለሀለው ዋጠ ምስዳር ሰኔት ተ፣ ክእኒ ለመስል መድሐራት ሽርጣን ወብዕድ ፈን እግል ለአተላሌ ህዬ ወጅብ፣ መድሐር ሸሪጥ ዕዳጊልማ ናይ አማን ሐሶሳይ ፈን ልትበሸር ሜሴት!!!