ሸዕብየት ኣጅያል እት ተአፈኔ እብ ስሜት ኣጅያል ለታጅር ተንዚም!

ሸዕብየት ኣጅያል እት ተአፈኔ እብ ስሜት ኣጅያል ለታጅር ተንዚም!

ሸዕብየት ለቀደም 31 ሰነት ወዴኮሃ ለትብል ዐመልየት ፈንቅል፡ ዮም ዓመት “ፈንቅል ሜራስ ኣጅያል” እት ሐንቴለ ልብል ሽዓር ዐየደተ። እብ መእማን ላኪን እሎም ትብሎም ለህሌት ኣጅያል ኤረትርየ ዲብ አየ ህለው? ለእተ መደት ለሃ ሸባባት ለዐለው ስሙድ፡ ተሐድያት ወፍርስነት ይአርአው እግል ኒበል ይእንቀድር። ለመጽእ ኣጅያል ኤረትርየ ሰላም ወረህየት ዲብ ለአዳውር፡ ሻንን ወሕቡን እት እንቱ እግል ልንበር፡ ለስራጠልሙስተቒም ለትመስል ቀጣን ገበይ ስጋለት ቃልየት አርወሐቶም ፍዘ እንዴ ወደው ተዓደወ። ዮም ላኪን ቀጣን ገበይ ስጋለት ክማ ሰእየት ለገብአት እተ፡ እሎም ወርሶ ልትበሎ ለህለው አጅያል ሻናም ወሕቡናም እት እንቶም እግል ልጊሶ ወልብጸሖ እባ ኢኮን፡ ክም ውላድ ሚንኣደም እት ሳውሪት ማ እንዴ ትረፈዓው እግል ልሕለፎ እበ ቃድራም ይህለው።

ክማ ዲብ ኣምሳል ሙጅተማዕ ትግሬ ለልትበሃል “እክል ምን ጅዳ ኢለአቅብል” እንዴ ትበሃለት ትትሃደግ ለዐለት ባጽዕ፡ ዮም ኣምበል አቅወዓት ጸላይም ወላ ዲብ ረአስ ምድር አስክ አያ ክም ለሃርብ ኣምር ለኢህላ ደመሚት፡ ወድ ሚንኣደም ለኢነብረ መዲነት መጃኒን ብድልት ህሌት። ከዲብ አያ ህላ እሊ ሸዕብየት “ፈንቅል ሜራስ ኣጅያል?” እንዴ ቴለት ተሓሌ እቡ ለህሌት ወትሰናቄ። ለትኬለማ ኣከይ ተካሪ ሸዕብየት ልብ ለሸፌ ሃገጊት እንዴ ትትሃጌ ሽቅል ሙጅርሚን ሽቅየታቱ። ሸዐብ ህዬ ለትመስሉ ራትዓት ገበይ በደል ጸብጥ እብሊ ስም ለትሓበረ እቱ ጥዑም ከሊማታ እንዴ ትቃሸሸ ነብር ህለ።

ሙናፍቀት ሸዕብየት፡ ዝያድላ ሙስተዕምሪን ኣባይ ኤረትርየ ፈናቀልነ እበ ልብሉነ ለህለው ፈንቅል፡ ሸዐብ ኤረትርየ ምን መሳክቡ ወመናበረቱ ፍኑቅልቱ ለህሌት በዝሕ።እብ ሙስተዕምሪን እንዴ ትፈናቀላ እት መዓሳክር ላጅኢን ነብር ለህለ እት አርዱ ወመሳክቡ እግል ለአቅብል ቃድር ይህለ። ሰበት እለ እብ ሸዓራት ወስቅራታት ለትትዘከር እንዴ ኢትገብእ እብ ፍዕል ለትትዐየድ “ፈንቅል” ትጠለብ ምኒነ ህሌት።