ተክነሎጂ ድሮን እት ሐርብ

ለበዝሐ መአንበት፡ ምህዞታት እግል ናይ ደሐን መሳልሕ ቱ። እግል መስለ ቲ ኤን ቲ ለእንብሉ መትፈርግዓይ ሓጀት: እት ወቅት ብነ ወሽቅየት ጽርግያታት አድብር እግል ሃገጎት ወዐባዪ እበን እግል ስብረት እንዴ ትበህለ ለትሸቀ ቱ። ሐር ላኪን እት ወቅት ሐርብ እት ልትነፈዖ እቡ:እት ረአስ ወድ አዳም ትሩድ ደረር እት ልአጀሬ ትረአ። ተክነሎጂ ድሮን (አዳም ለአለበ ጥያረት)መ እት ለአብት ለመህዘዉ አንፋር እግል ናይ ደሐን መሳሌሕ ክም ዐለ ልትሽረሕ።ድሮን እምበል ብዞሕ ተዐብ ወናይ አዳም ስዳይት እት ወድ አዳም እግል ልብጽሖ ለኢቀድር አካናት: አው እግል ደሕኑ እት ደረር ለከሬ አካናት:ብሑስ እግል ውድየተ ተ ለትመህዘት።ብዞሕ እንዴ ኢትጸኔሕ ድሮን እት ስለለ ወጀሳስት ዕስክረየት እግል ልክደመ አንበተየ።እትሊ ለህሌነ እቱ ወቅት ህዬ ድሮናት እት ሕሩብ እብ አቲ: ሜዛን ሐርብ እት ቀይረ ልትረአየ ህለየ። እት ናይ ዮም ክቱብነ:እት ሐርብ ከድመ ለህለየ ድሮናት ከአፎ መስለ እግል ንርኤ ቱ።ቀደም ቅሩብ ወቅት ድሮናት ሐርብ: ካሜራታት እንዴ ገአ እተን እግል ዐይን ወጀሳሰት ቱ ነፈዐ ለዐለየ። እትሊ ወቅት እሊ ላኪን መዳፍዕ ወሚሳይላት እንዴ ረፈዐየ እት ወድነ ሐርብ እት ለአትየ ልትረአየ ህለየ። ድሮናት እብ ግዝፈን ምስል ጥያራት እት ነአትጃግረን መረ ነኣይሽ ተን። እብ ተውሳክ ሰዋግ አለበን: ክእኒ ሰበት ገአየ ህዬ ወለ እንዴ ትዘበጠየ ወድቀየ ምን ገብእ: ለመይት ምንከ አዳም አለቡ። ሰዋገን እት ረያም አካን (ስትዌሽን ሩም) እት ክርሲሁ እንዴ ትገሰ: እት በሌዕ ወሰቴ ወምስል ጀማዐቱ ልትሰሐቅ ቱ እብ ገበይ ሳተላይት እንዴ ወደ ለቀውደን። እትሊ ወቅት እሊ ብዝሓት ድወል ድሮን ሸቅየ ህለየ። ሰበት እሊ በዲር እት ሑዳት ድወል ሌጠ ሕዱድ ለዐለ: ተክነሎጂ ድሮን እት ብዝሓት ድወል እንዴ በጽሐ እት ልጠወር ገይስ ሀለ። ለማ ናይ ሐርብ ድሮናት ለኢሽቅየ ድወል እት ናይ ደሐን ወብሕስ መናፍዕት ለከድመ ድሮናት እት ሽቅየ ልትረየ ህለየ። ልግባእ ደአም አስክ እለ እት ወቅት ሐርብ ውቅል ተረት ለህሌት እለን ድሮናት ለሸቅየ ድወል ሕዱዳት። ቻይነ: ትርክ: አምሪከ ወእስራኤል ክም መሰል እግል ልትሰመየ ቀድረ። ምን እለን ለሸቅያተን ህለየ ድሮናት ምስል ሰረን እግል ነአትኣምረክም ቱ።

ዊንግሎንግ 2:-

እት ቻይነ ለትሸቄት እት ገብእ እግል ናይ በረ ዕዳገ ለትሸቄተ። ዊንግ ሎንግ 2 እት ምግባይ መትወቃል እግል ረዪም መገይስ ትነፌዕ። ምን 10 000 አስክ 30 000 ኢንች እትለ ህለ መትወቃል፡ ምን 24 አስክ 48 ሳዐት እምበል ዕርፍ እግል ትንፈር ትቀድር። ዊንግ ሎንግ ሪመ 11 ምትር: መትወቃለ 4.1 ምትር እት ገብእ 20.5 ምትር ፍይሒነ ለቡ ክልኦት ደነብር በ። ሮኬታት ወሚሳይል ለረፈዐ ዊንግሎንግ 2 አስክ 480 ኪ.ግ ከባደት ለቡ አጽዋር እግል ትርፈዕ ትቀድር። እብ ሰታላይት እት ትትመረሕ: እት ሐድ 1500 ጮርሕ ለበ ክሎሊት መራቀበት ምን ስትዌሽን ሩም እት ገብእ እተ ሽቅለ ተአገዴ።

ባይረክታር ቲቢ 2፦ባይረክታር 2፦

እት ትርክ ለትሸቄት እት ገብእ: ዐዳእ ሕልፍ ኔቶ ላተን ድወል ወድወል ምግባይ ምፍጋር ጸሓይ ልትነፈዓበ ለህለየ ድሮን ተ። እግለ ድሮን ለሸቄት ሸሪከት ‘ባይካር ዲፈንስ’ አስክ እለ ክድመት እትፍርርተን ለሀሌት ሐድ 160 ባይረክታር ቲቢ 2 እት ገበአ: እት ትርክ: ቀጠር: ዪክሬን ወአዘርባይጃን ክድመት ለሀይበ ህለየ። እት ብዝሓት ድወል ክም ከረ ፖላንድ: ሞሮኮ: ስዑድያ ወላቲቭየ ጠለብ ራክበት ህሌት። እት ምግባይ መትወቃል ረዪም እግል ቲጊስ ለትቀድር ባይረክረ ቲቢ 2 አስክ 150 ኪ.ግ ከባደት ለቡ ቀናብል እንዴ ረፍዐት እት 300 ጮርሕ ምን አካን ቅያደት ለበ ክሎሊት እንዴ ገአት ክድመተ ተሀይብ። ባይረክረ ቲቢ 2 ሪመ 6.5 ምትር: መትወቃለ 2.2 ምትር እት ገብእ 12 ምትር ሪም ለቡ ደነብር በ። ምን 18000 አስክ 27000 መትወቃል ለትነፍር ወክደመት ተህይብ እት ገብእ 4 ሚሳይል እግል ትርፋዕ ትቅቀድር።

ኤምኪው-9 ሪፐር(MQ 9)

እት አሜርከ እብ ጀነራል አቶሚክስ ለትትበሀል ሸሪከት ለትሸቄት ተ። መረ ጥውር ሰዋግ ለአለበ ድሮን ክምተ ልትሸረሕ። ኤምኪው-9 ሪመ 3.6 ምትር: መትወቃለ 3.6 ምትር እት ገብእ፡ 21.12 ምትር ሪም ለቡ ደነብር በ። ኤምኪው-9 አስክ 50000 ኢንች መትወቃል እግል ትንፈር ለትቀድር እት ገብእ 1300 ኪ.ግ ከባደት ለቡ መትፈንጅራይ ሓጃት እንዴ ረፍዐት፡ እግል 277 ሳዖታት እግል ትንፈር ትቀድር። አምሪከ እለ ድሮን አስክ እለ እት ፈተቻ ላተን ድወል ሌጣቱ እዝቢተን ለህሌት። እት ክም ጥልያን: ፈረንሳ: ስጳኛ ተን ኤምኪው-9 ዙቡያት ለህለየ።

ሄሮንቲፒ

ሸሪከት ኤሮስፐይስ ናይ እስራኤል ለሸቄተ ድሮን እት ገብእ: አስክ 27000 ካባደት ለቡ ሚሳይላት እግል ትርፈዕ ትቀድር። እት ሐድ 45 000 ኢንች መትወቃል እግል 30 ሳዖታት ለትነፍር ሄሮንቲፒ ሪመ 14 ምትር እት ገብእ፡ 26 ምትር ለገብእ ደነብር በ። ሄሮንቲፒ አስክ እለ እት አልማንየ: ኣውስትራልየ: ፈረንሳ: ግብለት ኩርየ ወከነደ እት ክድመት ትትረከብ። እት አፍጋኒስታን እትለ ገአ ሕሩባት ሕልፍ ኔቶ ድድ ጣሊባን እትለ ወደዉ ሕሩባት፡ እብ ብዝሔ ሄሮንቲፒ ክም ትነፈዐው ልትሽሰረሕ።

ክድመተን ወዐውለን

እለን ለእብ ቻይነ: ትርክ: ኢራን: አምሪከ ወእስራኤል ምሁዛት ለህለየ ድሮናት፡ እትሊ ወቅት እት ብዞሕ ሕሩባት እት ዐመል እት ልውዕለ ልትረአየ ህለየ። ትርክ ለሸቄተን ድሮናት ብነ።እት ሐርብ አርሜንየ ወአዘርባይን ከድመየ። እት ፍንጌ አዘርብጃን ወአርሜንየ እት ለገአ ሐርብ: አዘርብጃን እንዴ ተዐወተት እግል ትፍገር፡ እለን ድሮናት ሰዳየት ውቅል ክም አግደየ ልትሸረሕ። አምሪካመ እግል ኤምኪው-9 ሪፐር(MQ 9) እት ምግባይ ምፍጋር ጸሓይ ትትነፈዕ እበ ጻንሐት ተ። ናይ ኢራን ጀነራል ቃስም ሱለይማኒ እብለ ድሮን ክም ቀተለ ወካይል እዕላም ሸረሐ። እት አምሪከ ወእስራኤል ለትሸቀየ ድሮናት ዐውለን ምስል ናይ ቻይነ ወትርክ ዶል ልትጃገረ መራ ቃሊ ቱ። ዓውል ናይ ትርክ ባይረክረ 2 ምን 1 አስክ 2 ሚልዮን ዶላር እት ገብእ፡ ናይ አምሪከ ኤምኪው-9 ሪፐር(MQ 9) ዐውለ 30 ሚልዮን ዶላር ገብእ። እብ ሰበት እሊ ብዝሓት ድወል ምን ቻይነ ወትርክ ረኪሳት ድሮን እት ልትዛበየ ልትረየ። ባይረክረ ቲቢ 2 ናይ ትርክ ብዞሕ ናይ ተክኒክ መቅደረት ሰበት በ ወእብ ዐውልመ ረኪሰት ሰበት ተ ምንለዓል ክለን ሕሪት ጋብአት ሀሌት።