ወድ ባሸቂር

ወድ ባሸቂር

አነ ረከብኩሁ ለጥቅር ብሩድ፡ ወድ ጽኑዕ እንቱ ወወድ ጽጉብ፡ እቼ ተዓዴቱ ለግርዝ ስኩብ፡ አምዕል ጋርስ እንሰ ወላሊ ጪፎት ድሩብ፡ ዓይሮ ወድ ነባይል ለቀጻፉ እብ ምደት ደሀብ ድንጉብ፡

ሚቱ ለሐሊብ ዑፉይ ኢልስተዩ፡ ምን ትትሸነህ ስቴ ወምን ጸግብ ከዐዩ፡ አፍሀ ወድ መንጆሪ ከልብ አንገሰዩ፡ ሰብ ወረክበ ወሰበዐዩ፡ አነ ለምስጢርዬ ሕልም አሰአለዩ፡ ወሕልም ኢልዳብር አፎ ኢሰትረዩ፡ ዓይሮ ወድ ነባይል ዊስ-ዊስ ሀረሰዩ።

ለወድለ ሕቱ ህዬ ከአስእለኒተ ሓሎ አፎ ሰተርካሀ ምንዬ ክም ቤለዩ፡ አዜመ ወድ ባሸቂር፡ ከእንተ ሕጻን አፎ ዝዕከ ትበዘሐ፡ ሚቱ እሊ ኩሉ ኣካክ ወመክሐደ፡ ኢተአትየ ቤተ ወኢተአምሩ ዐደ፡ ገሮበ ኢትበከረት ቱ አምበል ሸሙት ጨከ፡ ወእገረ አምበል ሄራር ሰከ፡ ዓይሮ ወድ ነባይል እት አፍ ቤተ አጽበሐ።

ቀየሕ ፈረስ ጀዐል ተ ሚ ቀየሕ ሕብር ሰሀል፡ እት ለኮየ ህሌት ሚ እት ሸገልገል፡ እት አቅሩድ ጨዐ ህሌት ሚ እት አቅሩድ ሕመር፡ ሞረ እት አርዋሁ ልትሰበር፡ ወክላል እት ካምቦሁ ልትዐገል፡ ዔለ እት መግበረ ትትሐፈር፡ ወሰሙይ እት ኔዋቱ ልትሰጠር፡ እተየ ህሌት ለካልእትከ ወሓልዬ ዑመር፡ ምን ሰትረ ምንዬ ዕምረ ልሕጨር። ቤለ ከሐለ ወድላ ሕቱማ እግል ወድ ባሸቂር።

ወለት ሕመድ ወድ ማሕሙድ መንሱራዬ መርሐበ፡ ሳሬናከ ቤለውኒ ስራዬ አዜ ትረከበ፡ ኢሳሬኒ አናዲ ሐሊብ ምንዲ ተሐለበ፡ ወኢሳሬኒ አናዲ ክትብ ምንዲ ትከተበ፡ ስገ ጉሊ በልዐኮ መረቅ ወለ ጀቀበ፡ ሰሓቅ ገብአ ፍንጌነ ለአፈች ምንዲ ትቃረበ፡ ቤለ ።

ኢሊዴና ምኑ ፋቲ እቡይ፡ ህታ ፋትየት ትግበእ ወእንተ ፍቱይ፡ ፋቲ መጋይሱ ወክድ እኩይ፡ ዶላ ኣመቃርብ ወዶል ኣምሱይ፡ ውሒዝ ኢከረዐና እብ ገነዲት ድሩይ፡ ጽልመት ኢትከረዓና ተአትባድዩ ለአግቡይ፡ ኣርዌ ኢከረዐና ኣፍለ ግቡ ትፉይ፡ ህመም ኢከረዐና ክማ ክታብ ሕልዉይ፡ ሐየት ኢከረዐና እንሸለሽል ድሩይ፡ ሐርማዝ ኢከረዐና መጀራቡ ድሉይ፡ ሐሪሽ ኢከረዐና ቀሩ ዎሮት ክልሹይ፡ ወራር ኢከረዐና እግል ራድኢት ስርጉይ፡ መማጽእትና ብዲር ወክድ እኩይ፡ መማጽእትና አዜ ሰኒ ሽሙይ፡ ህተ ዓግር ዐለት ለከቦሃ ልዉይ፡ ወአና በጽሕ ዐልኮ ለሐለንጋዩ ክሩይ፡ ምን ለዓርገ አምበሌዬ ወአምበል ሸሎግ ሀቡይ፡ ቤታ ሽትትተ ዝናበትለ ኣድሁይ፡ ሴቲት ደምበር ባረ ወዕስረ ሰጋር ዕሉይ።

ዑመር ፡ ዑመር ልብለ አንስ ብዲር፡ ዑመር በርከ ትደረ ሓዚ ነቢር፡ ዔለ ከማከመ እግል ቀቢር፡ ውላድ ረብዐት ኢኮን ፈትሕ ወአሲር፡ ሕጣጥ ዓግር ኢኮን ምልተሐ ፈቲር፡