ያሬት ግብእነ ምን ነሓኬ

ያሬት ግብእነ ምን ነሓኬ

እብ ደሳሌ በረኸት ምን ክታብ መቅበረት ክብት ወዘን ምን ሰፍሐት 187 አስክ ሰፍሐት 196

ምን ክትረትለ ጭንብወ ለአርድ አዳም ሳክኑ ኢመስል። እክል እሊ አብያት ዕሙር ለትርኤ ዲቡ ድጌ ክእነ ትመስል ጭንብወ መረ ትፈከርኮ።እብ ልብዬ ገሌ ጃሪ ገብእ ሀለ እንዴ እቤ ሰኒ ሐሰብኮ።ለወቅት ወቅት መዓየረትቱ።ወቅት መዓየረት አክራን አዳም ወንዋይ ዝያድ ልትሰመዕ ወእብ ፍንቲት አክራን ንዋይ።ላኪን ክሉ ረአሱ ለገብአት ሐረከት ኢትርኤ ወክርን ኢትትሰመዕ።አነ ክእነ ትመስል ጭንብወ ሳደፈተኒ ምን ገብእ ሰኒ አንዝዕጅ ወእትሻቀል።

ነፍሼ ሰባት እንዴ ሰአነት ኬን ወእንሰር ትዋለብኮ፡፡እት ምግብ ጀምዐ (መቅበረት) እበጥር ለህሌኮ መስለ እቼ። ለገብአት ትግበእ ክርን ወለ ዘብጥ ናይ ስለሕ ለትትሰፍለል እቱ ወቅት ሰኒ ስዱድ።ምነ ኣቲ እተ ለዐልኮ ጭንብወ እግል እፍገር ለገብአ መሻቀዪ ክርን ለወዴ እግል እርከብ ዲበ ሸንጠቼ እንዴ ትወለብኮ እለ ቀናፈልኮ።እት ቀበትለ ሸንጠት ለዶል ሰፈርዬ ክሉ ረአሱ ለኢተርፍ ምንዬ መሰጀል፡ካሜረት ወራድዮ ዐለው።ለራድዮ እንዴ ፈትሐኮ እግል እስመዕ ዲብ እዳሌ ላኪን ለእታከዩ ዐልኮ ሓምድ ምን ረዪም እንዴ መጽእ ረኤኩሁ።

ለዲብ መደት ንእሼ ድጌ ዕሙር እብ አዳሙ ወንዋዩ አምሮ ለዐልኮ ዲቡ ኦሮት ነፈር ለእሉ አምር ሌጠ ሰበት ረከብኮ ሰኒ ትፈከሮ ወአሰፍ ዐባይ እተ አቴኮ።

ሓምድ ሰላም ብርድት እንዴ ትሳለሜኒ አካን ለእበ እንገይስመ እብ እዴሁ አሸየረየ እግልዬ ወአሰር አሕድ ትበገስነ።እላመ ውዲት እለ እግልዬ ዝያድ ሻቀለተኒ ወሰፍለለተኒ።

ሽወየ ክምሰል ጌስነ ዲብ አፍ ባብ ኦሮት ቱክሊብ በጽሐ ወእግል ንእቴ እተ ባብ በጠርነ።ሐቆ እለ ክርን ሰኒ ድህርት ምነ ቀበትለ ቱክሊብ ትከበተተነ።ሓምድ ለክርን ድህርት እንዴ ለአተንሴ አስክዬ ትወለበ።

“አብዬቱ እሊ ልትሰራበብ ለህለ።አምዕል ታመት እለ እለ ሰምዕ ለህሌከ ሕላየት እንዴ ልብል ልውዕል።እሊቱ ዲብ እለ ድቡእ ልውዕል ምን ክሉ ለተአኬ ርእያይ እንዴ ሐግለ እብ ጭምብወ ትመጨረ።ምን መይትመ ምን እግል ልርአዩ”ቤለ መስኪን ሓምድ ምን ሓለት አቡሁ ሰኒ እሱፍ ዲብ እንቱ።

ጽበጥ ናይለ ሕላየት እግል እስመዕ እዝን ከሪኤኮ እለ፡ ክርን ናይለ እናስ ላኪን ሰኒ ድህርት ዐለት።ከሊማት ለእሉ ለአፈግር ዐለ ብዙሕ ዋድሕ የዐለ ላኪን ገሌ ምነ ሕላየት ክእነ ልብል ዐለ፥-

ሳምን ውላድ ቅሬሽ ወሳምን ውላድ አሉለ፡ ሳምን ውላድ አሉለ አፌት ኖሶም ትትከጀል ወአፌት ጸሮም ወሩረ፡ ሳምን ውላድ አዜ ጸሓየ ወለ ሀሩረ፡

ሐቴ ተቦ ምን ሐ እት መኣስር ለአውዑለ፡

እግል ልሕለቦ ምን ለሐዙ ኢተአጠልል ዐሙረ፡

ገርሀቶም ምን በዴ እሲት እብሚ ለአንቡረ፡

ወለቶም ምን ደንግል ዐስር እሎም ሰሉለ፡

መርዓቶም ቅልዕት ብሶት ሐመችተ ኖሶም ከጁለ፡

ኢበርእወ ለእኪት ወሐምቀት ኢከጁለ፡

በይን ነስአተነ ስድት እግል ምን ለአስኡለ፡

ለእግሉ ነሓኬ ተሐገለ ጭዉየ ወለ ዕጉለ፡

ሚ ኒደየ እለ እድንየ አከ ዲብነ አሱረ።(2)

ለሕላየት ሰኒ ረያምተ አነ ላኪን እለ ክርቴፈት/ቅራጭ እለ ጸበጥኮ። ለእናስ ምን ግብእ ለአፈግረ ክም ዐለ ተአከድኮ።ወዲብ ነፍሱ ሕምቅ ምን ኢልስኤ ፈራሰት ውላድ ቅሬሽ ዎ ውላድ አሉለ ወኢፈቅደ እቤ እበ ልብዬ።ሐቆ እለ ሓምድ ለባብ እንዴ አሽከተ ክልኢትነ አሰር አሕድ አቴነ።ለእናስ ህዬ ሕላየቱ ኣንዴ አትካረመ “አላ……ህ” እንዴ ቤለ ሰኒ አተንፈሰ። “ሕናቱ ይበ ሰኒ ውዕላም”ክም ቤለ ሓምድ፡ ለእናስ “አነ ህዬ እሊ ዕሉ ነሳብ ምን እለ ቤት መትከርዖት አበ ህቱ ዲብ እንቱ መጽአ አምሰልኮ፡ ሓምድ ወልነ እንተ” እንዴ ቤለ “ሚቱ ሕናቱ ምን ቴልከኒ፥ዮም አዳም ዲብ አየ ትረከበ፥”እት ልብል ትሰአለ።

ምነ ህግያለ እናስ ዲብለ ድጌ ሮይ ናይ አዳም ሕጉል ክም ሀላቱ ለትፍህም።ለእናስ ምን ወልዱ ወኬን አዳም መጽኡ ወበጽ|ሑ ክም የዐለ ትትአከድ።

አናቱ ይበ ዎ ጋሸ ሀለ ምስልዬ እግልከ እግል ልርኤ መጽአ ቤለዩ ሓምድ እግል አቡሁ እብ ክርን ውቅል።ለእናስ እንዴ ለአስተቅርብ ጋሸ እግልዬ ለጋንሕ አነ ዮም ሚ ጋንሕ ዲብዬ ቤለ ሰኒ እሱፍ ዲብ እንቱ።ለአብ እሊ ሰኣል እሊ እንዴ ልትሰአል ወእሊ እስትቅራብ እሊ እንዴ ለአስተቅርብ ነፍሱ አክልአዪ ምን አዳም ክም ሬመት ወረእየት ናይ አዳም ክም ጸብረት ክሉ ረአሱ ኢለአሸክከካኒ።

እግል እሳለሙ እዴዬ ክም ሀብኩሁ፡እብሚ ዕንታት እግል ልርኤከ አቡዬ ከላስ እንዴ ቤለ፡ይበ ሰላም ልብለክም ሀለ እዴክም ሆቡ ቤለዩ እግል አቡሁ፡ወሐር ለእለ ተሐዜ ህሌከ ትሰአሉ እንዴ ቤለ ዲብዬ ትወለበ ሓምድ።ለእዴሁ ክምሰል መደ ዲብዬ ኖሼ ነስአኮሀ ከ አቡዬ ገብሬስ ወድ ከም ሰነት ገብእ እቤሉ፡ ሰኣልዬ እብ ምግብ አምበትኩሁ።

አነ እግል ልስመዐኒ እብ ክርን ውቅል ዶል እትሰአሉ አቡዬ ገብሬስ መ እብ ክለ ሒለቱ እንዴ ልትጋደል ለእለ ቡ ሒለት እንዴ ትነፈዐ እግል ልብለስ እግልዬ ለሐዜ። ምነ ግንሐቱ እዘን ወዕንታት ምስል ጣልሙ ክም ሀለ ትትአከድ ምኑ። ዲብ ግንሐት አቡዬ ገብሬስ እንዴ አስተቅርብ እት ሓምድ ትወለብኮ ወአብተሰምኮ።ልብ ምነ ክርሲሁ ሐቆ ጀለ ክሉ ምስሉ ጀሌ።“ምነ ግንሐቱ ፋርግዬ ህሌከ” ብህሉ ለህሌከ መስል መስኪን አቡ ገብሬስ።

ሓምድ ዲብዬ እንዴ ትወለብ “ዕምር አቡዬ ሳምን ሳምን ቱ ማሚ ለልትባደል ዮም ወድ 150 ሰነት/ዓመት ህሌኮ ምን ልብለከ ሐቆ ሳምን ምን ትትሰአሉ ህዬ ምን 90 ሰነት የሐልፍ ልብለከ አቡዬ እብር እት ክሉ ገሮቡ ትዘረአ እግሉ።”

ከአነ እግል ልዳግም እግልዬ ሐዝዩ ህሌኮ፡ ድግም ቀዳምያም ፈቅድ ገብእ፥እንዴ እቤ እግል ሓምድ ክምሰአልኩሁ፡ ሓምድ ድግም ላተ ሰኒ ዳግም እግልከ ህተ ሌጠ ተርፈት ምስሉ ዲበ ላቱ ሰኒ ትሩድቱ ።እብ ንእሽነ ወህቱመ እንዴ ክእነ ኢገብእ ዳግሙ እግልነ ለዐለ አክልሕድ ዮም መ ክመ ናይ ብዲር ደግሙ ሀለ። ምን ድግም ላተ ኢትፍረህ አቡዬ ወድግም ረአስሕድ ልትወለዶ ቤለ ሓምድ።

አቡዬ ወድግም ረአስሕድ ልትወለዶ ለትብል ታመት ሕስበት ናይ ሓምድ ሽወየ አሻይር ቅብብ ለተአርኤ ትመስል ዐለት። እለ እሻረት ቅብብ እለ እግል አቡዬ ገብሬስ ሌጠ እንዴ ኢትገብእ እግልዬመ ምስል ምህነትቼ ክመ ሸምለት ተነ መስለት እቼ።

አነ ህዬ ምን ድግም ወክትበት ተእሪኽ ዝያድ ሚ ዋዲ ገብእ አነ እንዴ እግል ርሕዬ ሰኣል ዶል አቅረብኮ እተ በሊስ እንዴ ይእረክብ፡ ሓምድ እብ ክርን ውቅል ህግየ አምበተ።

ይበ እሊ ጋሻይ ኬትባይ ተእሪኽ ቱ፡ እብ ሰበትለ ዲብ እሊ ዐድነ ዐለው ለልትበሀሎ ገዛይፍ ውላድ ሚንኣደም ወሐሬ ሰርተው ለልትበሀሎ ቆም ሩም እግል ልትሰአለከ ማጽእ ሀለ ቤለዩ እግል አቡሁ።

“አሃ ቆም ሩም ሚ ገብአው፥ምነ ሕነ ራክባመ ለህሌነ ተአኬ ረክበው፥እንዴ ቤለ እብ ክርን ውቅል ሰኣል አትሐደሰ ዲብነ አቡዬ ገብሬስ።

እዘኑ ለከብደ ምኑ ነፈር እግልሚቱ እንዴ ወቀለ ልትሃጌ፥ ክሉ ለአዳም ክምሰልሁ ምሽክለት ናይ ስመዕ ለቡ መስል እቱ፥ መ ለእሉ ለአፈግር ህለ ሀገጊት መራቀበቱ ለሐግል፥ ክሉ ረአሱ ኢልትፈሀምኒ።

ሐጅሞም፡ ብጥረቶም ወብዕድ ግዝፎም አክልአዪ ዐለ ልትበሀል እቤሉ እግል አቡዬ ገብሬስ አናመ እብ ክርን ውቅል።

አክልአዮም ዐለው እግል እበለከ፥ ኣፈት ረበነ ዐለው ልትበሀል ወልዬ። እሊ ወደግ ሩም ልትበሀል ኢተአምሩ፥ ምኑ ኦሮት ምን ሰብ ሩም ማይ እግል ልግለል ዶል ለሐዜ እግሩ ለሐቴ ዲበ መዐደይ ለኦሮት ወለ ካልኣይት እግሩ ዲበ መዐደይ ለኦሮት ወድየ ዐለ ልትበሀል ቤለ፡ ወለ ክልኤ እዴሁ እብ ሒለት መደየን እግልዬ እግል ለአፍህም፡ አቡዬ ገብሬስ።

እለ መቅበረት ሩም እት ደበሽ ለህሌት ረኤካሀ፥ አክል እለ ቤት ለዲበ ህሌነ ገብእ ለኦሮት ቀብር ለናዮም። እብ ድግም ኦሮት ምን ቆም ሩም ምን ረአስ ደብር እንዴ ዐንጠጠ እግል ሰልሲትነ እብ ሐቴ እዴሁ ወሀረሴነ ልትበሀል ምን ክትር መተራዶም ቤለ እበ እት አካነን ለይዐለየ አንዬባቱ እግል ልሰሐቅ ዲብ ለሐዜ።

ለህሌነ ዲቡ ድጌ እብ ክሉ እንክራቱ እብ አድብር ለትከለላቱ።ለዐበ ደብርመ እትለ መንጠቀት እለ ሀለ፡፡ ወክመ ስሜቱ ተሐብረ ለትወቀለ ደብር እተ ባካት ህቱቱ። እት ረአስ ደብር እንዴ እንቱ እብ እዴሁ ለለዐነጥጥ ኽልቀት እንዴ እቤ ሰኒ ትፈከርኮ፡እግል አትዋይኑመ ምን እቤ ሕላሌ ከርዐተኒ።

ድግም እብ ቆም ሩም እግል ሰልፍ ዶል ኢኮን እሰመዐ ለህሌኮ፡ ነኣይሽ እት ህሌነ እብ ሰበት እሎም ፈነው ለልትበሀሎ ቆም ሩም ብዙሕ አድጋማት ትደገመ እግልነ ወሰምዐነ።እት ደዋይሕ ናይለ ድጌ እብ ስሜቶም ለልትሰሜ አካናት ወተርፍ ሀለ።እብ ፍንቲት እብ ባካት መቅበረት ቆም ሩም ዶል ሐልፍ ሐቴ መስአለት አትዋይን። እሊ አቅብር ምንዲ ነሐንፍሉ ከአፎ ወጸንሐ ገብእ፥ እንዴ እቤ ክልዶል ሐስብ። እብ ለመድ ሙጅተመዕነ ላኪን መቅበረት በህለት ጀምዐ ኢኮን እግል ትሕፈረ እብ ስምጣመ እግል ትሕለፍ ወእብ እዴከ እግል ተአሽር እተ መረ ስዱድ ቱ።ነኣይሽ ዲብ ህሌነ እብ ስምጥ ጀምዐ ዶል ነሐልፍ ወእብ እዴነ አስከ ዶል ነሐብር ለዐስር ጭብዕትነ እብ ሐት-ሐቴ እነክሸን ነበርነ ወክመ ዔብ ለወዴነ መረ ንትአሰፍ።ሐበሮት አስክ መቅበረት ዔብ ሐቆ ገብአ ከአፎ እንዴ ወዴከ ቀብር እሎም ፍንቱያም ላቶም ኽልቀት እግል ትሕፈሩ ክሉ ረአሱ ኢትገብእ።

እግል አቡዬ ገብሬስ ለብዕድ ክሉ እንዴ አዘምነ ምኑ እንዴ ቆም ሩም ከአፎ ፈነው ሌጠ ዳግም እግልነ እቤሉ እብ ክርን ውቅል እግል ልስመዐኒ እንዴ ኣቤ።

ቆም ሩም እብ መድሐር በደው ጣይ-አቡከ ቤለ አቤዬ ገብሬስ አዜመ እት ልትሰሐቅ ወአስክ ሓምድ ወልዱ እንዴ ልትወለብ።

አነ እለ አዜተ እግል እትአከድ ብዬ “እብ መድሐር በደው መ እብ መርገም፥” እቤሉ እግል አቡዬ ገብሬስ።

ዲብ ሙጅተመዕነ ለገብአ ልግበእ ነፈር እብ ደዐ ወመድሐር ቱ ለልትበገስ።ዶል ሐርስ፡እት ንዋይ ለልትፈረር ወእግል ሕጻይ ወህዳይ ለገይስ ክሉ መድሐር ወደዐ ምን ዐባዪ እግል ልንሰእ ላዝምቱ።እግል ልደሐሮ እንዴ ቤለው ለገብአት ሰኔት ወዱ። ምን መርገም እንዴ ፈርሀውመ ምን ብዙሕ ሓጃት ለልትገሰውመ ህለው። መድሐር ወመርገም ዲብ ሐያት ሙጅተመዕነ አካን ዐባይ ጻብጣት ተን ዶል ቤለ አቡዬ ገብሬስ፡ ከቆም ሩም እብ ከአፎቱ እብ መድሐር ፈነው፥ ምን ክሉ ለአምሩ ብዙሕ አድጋማቶም እለ ሳምዐ የአነ የአምር መ እንዴ ሰምዐኮሀ በዴት ምንዬ እት ተፍኪር ብዙሕ ትሸመምኮ።

“ከ እብ መድሐር ከአፎ፥ መድሐር ተአበዴ፥” እንዴ እቤ እግል አቡዬ ገብሬስ ሰኒ አጽበጥኩሁተ ወበሊሱ ታኬኮ።

“ኣቤ እብ መድሐር ላኪን እብ ሕርያኖምቱ። ቆም ሩም ረቢ ክም አቅደበው እግል ለአብድዮም ሐዘ ወእብሊ ሕርያን ሀበዮም። “እብ መርገም አብዴክም፥ መ እብ መድሐር” እንዴ ቤለ ክም አትሐረዮም። ምን መርገም ላተ መድሐር ተሐይሰነ ቤለው ከመድሐር ሐረው እንዴ ቤለ አቡዬ ገብሬስ ስሕቅ ወደ።

ወሐሬ እንዴ እቤ ሰኣል አትሐደስኮ ዲቡ ወበሊስ እብ አኖካይ ታኬኮ።

“ረቢ እባሁ ደሕረዮም፡ አንስክም ውላድ ተብዕን ልውለደ ወንዋይክም አንሳት” ክም ቤለዮም ቆም ሩም ገላይል ዐለው። እለ ላተ ሰኒ መድሐር ሰኔት ተ እንዴ ቤለው እብ ፈርሐት ከበተወ።ክመ እለ ኢቀዌከ ሰብ ዐድነ እንዴ ልድሕሮ ውላድ ተብዕን ወእግል አንሳት ልቡሎም እብ ፍንቲት እግል መርዓውዮታት።ወድ ተብዐት ምን ተሀሌ ሬፍዓይካቱ ወምን መይት ዌርሳይከ ወንዋይመ አንሳት ሐቆ ወልዳቱ ለበዝሕ እት ልብል ሸከሙ ጣሰሰ።

ከእለ መድሐር እለ ከአፎ መርገም ገብአት እሎም እቤሉ፡ ለዲብ ቆም ሩም ለጀሬት ፍህምቼ ዲብ እንተ እግል ዝያድ ልዳግም እግልዬ እንዴ እቤ።

“ጽነሕ አከልሰኒ፡ ቆም ሩም ሐቆ መደት ረያም ክሎም ሰብ ተብዕን ገብአው ወለ ለሀድወን አንስ ሐግለው፡ ወንዋዮም መ ክሉ አንሳት ገብአ ወተብዐት ተሐግለ።ወእለ መድሐር እላተ መርገም ገብአት እሎም ከበደው እንዴ ቤለው ዋልዴነ ዳግሞ እግልነ ዐለው። ሐሬ ቆም ሩም ባድያም ምን ኢገብኦ ምስሎም ዲብ እሊ አርድ አዳም ብዕድ ወኢነብረ ልትበሀል። ኽልቀት ናዮም ፍንቲት ዐለት ቤለ እንዴ ለአስተንትን።

ቆም ሩም እብ ሐርብመ ፋንያምቶም። ምስል እሊመ ዕልብ ለአምሮ የዐለው ልትበሀል። እተ ሐርብ ከም ነፈር ክም ሞተው ምኖም እግል ለኣምሮ ህዬ ኦሮት በሰር ዐለ እሎም። ለእተ ሐርብ ሻርኮ እተ ቀዕረት ዲብ ረአስ እበነት ዐባይ ክልምኖም ከ ሕጽሕጸት ከሬ ወገይስ። ምነ ሐርብ ክም አቅበለው ለእብ ሰላሞም ማጽኣም ለህለው ክል ምኖም ከ ሕጽሕጸቱ ነስእ። ለተርፈየ ህዬ ዕልብ ናይለ እተ ሐርብ ለሞተው ገብአ ከእብሊ ለአምሮ ዐለው። ዕልብለ ሞተው ቶም ለልትበሀለ እበን አስክ አዜ ዲብለ ረአስለ ደብር ክሙር ሀለ። አዜመ እብ ለመድ ብጥረቱ ረያም ለገብአት ነፈር ሮማይ ልትበሀል ኢሰምዐከ ። እሊ ቆም ሩም እግል ልውሰፎ እቡ እንዴ ትበሀላቱ ሮማይ እንዴ ቤለው ለለአተባቁሩ።

“እሊቱ ለእሉ እግል ትክተብ ተሐዜ ህሌከ” እንዴ ቤለ አቡዬ ገብሬስ ትሰአሌኒ።

አይወ እሊቱ እብ ፍንቲት ቅሰት ፈነ ቆም ሩም አምረ የዐልኮ እለ እግል ኣኣምር እንዴ እቤቱ ክም እቤሉ፥-

“በይ ጣይ-አቡካቱ በደል ናይ ቆም ሩም ወቀደሞም ወግራሆም ለዐለ ትከትብ ግብእነ ምን ከትብ ወይሔሰ ገብእ፥ አፎ ግብእነ ኢነሓኬ፥ ሕናመ ፈኔነ ማሚ ምን ቆም ሩም ሚ ፍንቲት ብነ። ለፍንቲት ለናይነ ወለ ናዮም ህቶም ለዲብ ደንጎበ ተርፈው አቅብሮም ኖሶም ሐፍረዉ ከ ሞት ዲብ ሕፍረት ቀብር ጸንሐወ ልትበሀል። ሕነ ላኪን ዲብነ እለ ዔብተ አዳም እንዴ ኢመይት ሕፍረት ኢትትሐፈር እሉ ወኖሱ ሕፍረት ቀብር ኢለሐፍር። ሕነ ምን ቆም ሩም ለተአኬ ጻብጠትነ ህሌት ማሚ እንዴ ቤለ ረአሱ ተሐት አድነነዩ ወዲብ ተፍኪር ትሸመመ።

“አፎ ግብእነ ኢትከትብ፥ ወግብእነ ምን ነሓኬ” ለትብል ዘዐት ሰኒ አዳወርኮሀ፡ ግብእ መጺጸት ተ። ግብእ መጺጸት ናይለ አብ ወወልዱ ሰኒ ሸዐርኮ እበ። ግብእ እበ እምርት ገበየ እግል ትክተበ እግል ኖሰ ግብእ ወመጺጸት ወስክ። ሚ እወዴ ክም ዐልኮ ክሉ በደ ምንዬ።

ለአተንሰዮት ሌጠ ጋብእ ለዐለ ሓምድ ቀንጸ ወበረ ፈግረ ምኒነ። ደሐን ክም ይህለ ሰበት ኣመርኮ እብ ሸፋግ ዐሬኮ እቡ።

ዕንታቱ ዕንብዕ እንዴ መልአ ገሀር ቀይሒት ጋብእ ዐለ። እብ ለመድ እት ሙጅተመዕነ እናስ ክሉ ረአሱ ኢበኬ ወዕንብዕ ኢለዐቀጥር። ወድ ተብዐት ለገብአት ትግበእ ስደት እግል ልጋብህ ለቀድር ወስድት ክም ኢትጀግሩ እንዴ ትበሀላቱ ዲብ ቀበት ዓኢለት ለልትረቤ። አንሳይት ላኪን ሒለተ ዲብ ዕንቤዕ ወብካይተ ልትበሀል። አንሳት እብ ለመድ ወዓዳት እግል ልንበዕ ሰበት ልትሰመሕ እለን ምን ግብእ ወመጺጸት ሽወየ ገሌ ለአርህየ ገብአ። ከግብእ ወመጺጸት ምን ናይ ሰብ ተብዕን ናይ አንሳት ትትሸበህ ገብእ። ወድ ተብዐት ላኪን ሚ ሊዴ፥

“አሃ ሓምድ ደሐንቱ፥” ክም እቤሉ፦

ህግየ አቡዬ አሰፈተኒ፡ አማኑቱ አቡዬ ሕነ ምን ቆም ሩም ሚ ፍንቲት ብነ፥ ምኖም ኢነሐይስ ምኖም ምን ኢነአኬ። ፍንጌ ድጌነ ወሎሀ መቅበረት ቆም ሩም ሐቴ ፍንቲት ህሌት አለቡ። ስናትነ አየ ህለው፥ ዲብ እሊ ደዋይሕ ክም ድጌነ ዕሙር ድጌ ዐለ አለቡ። ዮም እሊ እሉ ትርኤ ህሌካቱ ለጀሬት ምን ጀሬ ሬድኣይ ተሐግል። እለ ጀምዐ ለእለ ትርኤ ህሌካተ ዮም ነፈር ምን መይት ለዲበ ትቀብሩ አለብከ ወለ ለአትቃብረካቱ ኢትረክብ። አርድ ሐርስ ወመስከብ ዲብ መቃብር ትበደለ። ለምን ክሉ ተአኬ ህዬ አርድ ምን አዳም እብ ሃሉ እንዴ ተርፈ እሊ ሮይ-ሮይ ልብል ለህለ ኖሱ ሞተ ምን ገብእ ቀብሩ ልትሐገል፡ እንዴ ቤለ ቀዳምያም ወሓርያም እንዴ ፈቅደ እብ ሒለት ከረዐ ለዐለ እንብዕ ክም ማይ ትከዔት ምኑ።

አናመ ዕንብዬ ኣግል እክረዕ ዲብ እትጋደል እግል አትሓጥሩ ጀረብኮ።

“መስኪናይ አቡዬ ዲብ ሙጅተመዕነ እንዴ ኢትመይት ቀብርከ ሕፈር ዔብቱ” ቤሌከ፥ ዮም ዔብ ትትበሀል ኖሱ ህሌት፥ ሐራም፡ ሐላል ገብአት፡ እኪት ክም ሰኔት ትለመደት። አናመ እለ ዔብ ለአቡዬ ልብለ ሀለ ከርዐተኒ ዲብ ኢኮን እትሚ ህሌኮ እግል ኖሼ። ዒረት ወመላጥ ገብእ ዲብዬ እት ኢኮን ሓለቼ እለ ለእለ ትርኤ ህሌካተ። እግል እሊ ዋልዳዬ እግል ይሕደጉ ዲብ አየ ወምስል ምን፥ ወእግል ይእትገሴ ምስሉ ሓለት ተአትገሴ ሚተ እለ። እት ውላድ ውላጄ ለተርፍ ዒረት ምነ ፈርሀኮ አቡሁ ኢቀብረ ምን ክሉ ተአኬ። አነ ዲብ ዴሽ ዐልኮ ወምን ዴሽ ምን ሀረብኮ ምኖም ወዲብ እሊ እት እትሓበዕ ሑድ ዋዲ ይህሌኮ።ረክበውኒ ምን ገብእ ክመ እለ ኢቀዌከ ምክራዬ ምክራይለ ሐውዬተ።እለ እንዴ ኢትገብእ ምን እሊ ዐድ እግል አሪም ሐዜ ላኪን አቡዬ ህዬ፥ ንዋይነ ለእለ አዝቤነ ወለ እለ ሐረድነ ክሉ ከለስናሁ አዳም ላኪን ሚ ትወድዩ ኢልትዘቤ ወኢልትሐረድ። ዮም አነ እሊ ዋልዳዬ ቀድር እግል ምን ገብእ ምስልዬ ወነስአኩሁ ላኪን እግል ኖሼ እብየ እግል እጊስቱ እንዴ ይአምር። እንዴ እብል ዐልኮ እብለ ሓለት እለ ከአፎ እግል እንበር፥ ላዝም ምን እለ ዐድ እግል እፍገር ብዬ እግል ሰላመት ርሕዬ። አቡዬ ዲብ እለ ቤት እንዴ ሞተ ርእያይ እግል ኢልስአን እፈርህ ዐልኮ አዜ ላኪን እሊ እናስ ዐቢ ግዋሬነ ምን መይት ወምን ለሐዬ ምስልነ ቤሌኒ ባረከለ ፊሁ እቼ እንዴ ፈርሀ። እግልሚ ምን እለ አካን ነስአውኒ ምን ገብእ እሙርቱ ምክራዬ ለአቀዉ። “አላ ……..ህ ትትፈሌ እለ ዐድነ ምን ክሉ ለሀይ ሸባብ ቀብርመ ለለሐፍር ተሐገለ” ቤለ ሓምድ ክልኤ እዴሁ እት ብሶቱ እንዴ ከረ ክመ ነፈር ለጋድእ ሐዲስ ለማጽኡ እንዴ ለአስተንትን። ሰሩር ወዴ ለህለ እት መስል እግል ዋልዳይቱ ወእግል ክለ እስረቶም እት ዳር አልኣኽረ ለበድረቱ።

አነ ሓምድ ክእነ እንዴ ልብል እተ አፍላ ባብ እንዴ ገብአኮ እሰምዑ ዐልኮ። ሚ እወዴ ክም ህሌኮ ክሉ በደ ምንዬ ወዚረቼ ተዐወጀት።

“ቅሰት ቆም ሩም ሚ እግል ትክተብ እተ፥ እለ ግብእነ አፎ ኢተሓኬ ወመጺጸትነ ኢትከትብ፥ምን ግብእ ቆም ሩም ግብእነ ተአኬ ማሚ፥ሕነ ክምሰልሆም ፈኔነ ማሚ ወምነ ናዮም ለለአኬ በደ ባድያም ህሌነ።እንዴ ይእመት አቅብርነ እግል ኢንሕፈር ዔብቱ፡ለልብል ከሊማት አቡዬ ገብሬስ ዝያድ ዲብ ረአሼ አዳወርኮሀ ወደሚርዬ አርተሖት አበ። ቅሰት ቆም ሩም እግል እክተብ ዲብ እብል ለኢትትከለስ ግብእ ዐጄ አትፋቀዴኒ። አናመ ክም ሓምድ ምን ዐድ እግል እትሸተት ቀረርኮ። ላኪን ምን ዐድ ምን አሬምኮ ወትሸተትኮ ምነ ግብእ ወመጺጸት ላተ ረዪም ይህሌኮ። እት ደም ለትሓበረየ ግብእ ወመጺጸት ከአፎ እግል አሪም ምነን፥ ክሉ ረአሱ ለልትቀደር ኢኮን።