ጪፎት ወቅሎ እት ዓዳት ትግሬ

ጪፎት ፍሬ እት ክታብ ዓዳት ወአድጋማት ትግሬ እብ አሳስ ለረከብናሁ ክቱብ፡ እተ ዘበን ቅዱም ዐምሳት ክም ወልደት እግል ሕጻን ወወለት ለትገብእ ከብቴ ክለ ሐቴ ኢኮን። እግል ክሎም ለገብእ ሀለ ወእግል ሕጻን ሌጠ ለገብእ። ጪፎት ወቅሎ እግል ክልኢቶም ለከስስ ምንማቱ ለተክቢተት በንበንተ። ለትወለደ ሕጻን ገአ ምንገብእ ሰልፍ ዕላል መበሸሮት/ብሸራት ለዐልለ፡ ወሐቆሀ ሰቡዕ ዶል አሰር ሕድ ለዐልለ። ወላሊ ትወለደ ምንገብእ አስቡሕ ሰቦዕ ሔማታት እት ቤት ሐራስ እንዴ መጽአየ ሰቦዕ ዶል ለዐልለ። እግል ወለት ላተ ኢፈረሐ ወኢለዐልለ እለ።

ለዐልቀት ዲብ ትትአተብ ወለት እት አስእን እመ ትትአተብ ወሕጻን እት አስእን አቡሁ። ለሕጻን ዲብ ልትአተብ አቡሁ እተባት ለሀይቦ፡ ምነ ንዋዩ እገሌተት ሀብክዎ እተባቱ ልብል፣ ወእለ እተባቱ እግለ ግርዝ ክም ማል ኖሱ ትትዐለብ። ወለት ላቱ ዳር አቡሀ ሰበት ኢትወስር ብዙሕ ኢፈርሖ እለ ወእተባት ኢትትሀየብ።

እት ልድሕራመ እግለ ሕጻን ዋልደት ወእግለ ወለት ዋልደት ለልድሕራሀ ፈርግ ተ። ዐምሳት ሕጻን ዶል ትወልድ “አሰናይ ክልኤ ሬሕ ገብአት፡ እብ ተብዐት ዓረፈት፡ ገደ ሶተ፡ ዕን ረኤቶ ከብድ ትክረዮ፡ ትጽገብ ምኑ፡ ቀዳም ሰቡዕ ልግበእ፡ ዐቤ ወጥቤ፡ ፈርሐቱ ሰልሐቱ ቲዚደ፡ ቀዳም ሐድግ ወሓር ወስክ፡ ሐዲስ ከብድ ግንዳብ በሌ ልግበእ እግልኪ፡ ንኡሽ ዐቤ እቱ ወዐቢ ዳብር እቱ፡ ግም ለእቱ ትወለደ እቱ ልሸንግል፡ ዐ’ለት በኪተት ትትወለድ ዲብነ። እት ድሕርቱ ለደመዐነ፡ ወስኮቡ ወሓይሶቡ፡ ጭገረት ማልነ ወአዳምነ ትብዘሕ እቱ፡ እት ሐረት ልግዘል። ስምጥ አበች ልብጠር፡ ዝናበቶም ልጽበጥ፡ ቤት አብ ባቅለት ልምረሕ፡ ድቢት ትትከልከሎ . . . “ እት ልብለ ልድሕራሀ።

ለትወለደት ዐልቀት ወለት ገአት ምንገብእ ላኪን ክእነ እት ልብለ ልድሕራሀ፡ አሰናይ ትከማከምኪ ወለት እምዬ፡ በኪተት ትግበእ እኪ ወለትመ አሰረ ሕጻን ትስሕብ ርሕም ጥሉቅ ቱ ሰኒ። አሰናይ ዲብ ሕቅፍኪ ከሬኪ። ሒሲበ ወዚዲበ፡ ቀዳምያም ተሐድግ ወሓርያም ትወስክ ትግበእ፡ እግል አንሳት ወውላድ ተብዕን ልትለየ።

ሐራስ እም ሕጻን ገአት ምንገብእ እት ቤት ሕርስ 40 ዮም ትከልእ ቀደሙ ኢትፈግር ወኢትከሬ መሓርሳይት ተሓርሰ፡ ተነተ ተስሕነ፡ ነብራሀ ወብዕደት ወራት ቤተ ትወዴ እለ። እም ወለት ገአት ምንገብእ ላኪን 30 አው 27 ምዕል ትከልእ። እሊ አምዕሎታት ሕርስ ክም ተመ ዐሱረ ተመ ትበሀል። እም ሕጻን ተአሸንግል ወእም ወለት ተአላጼ። ልባስ ወክሉ ለሐራስ ትነፈዕ እቡ ዐለት ክም ከረ ትክዐሌ ወምን ጭገር አባጌዕ ለምሩን አግዳድ እሞልድ ምዕጥን እንዴ ትወርድ እቡ ልትሐጸብ ወሰኒ እንዴ ትማደደ ክም የብሰ ተዐይር እቡ። ወእግለ ሽንኬባይ ወብዕድ እተ ምዕጥኑ እት አካን ምውሓዝ ተሐድጎ ከተዐይር።

እለ ምዕል እለ ለሐራስ ትትሐጸብ ወአጀኒት ነአይሽ እንዴ ትላከየ ከእግለ እደዮም ምንለዐል ለምኦሻት ውደዎ ልብላሆም ከማይ ልክዕየ እቱ። ወለውላድ እሳት ትቅሰን ወሕጻን ልስለሕ ልብሎ። ወለእሳት ክም ቀስነት ለጨበል፡ ፈሐም ወቀጨጭ ለቤት ክለ እት ሰፍእ ረፈዓሁ ወለውላድ ለጸውራሁ፡ ወሕጻን ወድ ሔመ መርሖም፡ ናይ ወለት ሀዬ ወለት ትረፍዖ ወረአስኩም ሐር ኢትትወለቦ ልብላሆም። ወእንዴ ጌሰው ቡ እት ዕጨት ዐቅቤተት ልክዕዎ ወክም አቅበለው እግል ክል ምኖም ሕፍን ምን እክል መለአ ከሀይባሁ። ወእተ ቤት ለሐራስ እክል እንዴ አብዘሐየ ጬፍየ።

ወሐር ለእሞልድ እብ ልባስ ክም አቴት ለሐራስ ልባሰ ትለብስ ከምን ዐርቀየ ትትከሬ ወዲብ አፌት ትፈግር። ገሌ ምጽቤጣይ ከሩ ከሐዬ። ህተ ለጅነ እንዴ ሀቅፈት ትከይዶ ወሰለስ ዶል ትትዓደዮ። ወሀር እንዴ ገጸ ገልበበት ከፍ ትብል። ምነ አንስ ለዲብ ስምጠ ሀለየ ሐቴሀን “ሐራስ ሐራሶ ምን አየ መጽአኪ” ለሐርስ ሀዬ ምን ባብ አክሱም እግል ጸርዕ ወዘርእ ልጥለል፡ እግል ንኡሽ ልዕቤ ወዐቢ ልድዌ፡ እግል ኮናት ቲበእ ወአርገ ልደምደም፡ እግል ጋሻይ ልእቴ ወበዐል ዐድ ልጽናሕ . . . ብዙሕቱ።

እሊ እት ሕድ ሰቡዕ ዶል ክም በላለሰያሁ ለዐልቀት ትላጼ። ጅነ ወድ ሔመ እንዴ ጸብጦ እሉ አኬነት ክም ላጸ፡ እናስ እግለ ግርዝ ክም ዓደት ዐድ አቡሁ ግሰት እንዴ ሐድገ እቱ ልግበእመ ጨደድቅ እንዴ ሐድገ እቱ ላጽዮ። ወእት ሳቤዕ ስሙይ ለኢጸንሐ ዕንዳይ ልትበሀል ለዐለ ግርዝ ጅነ ለሐረየ ቀጥፈት እንዴ ትከሬት እቱ ስሜት ትፈግር እሉ። ወለጪፎት ለእለ ጬፈው እግል አግዋሮም ፈረዕ ድማን ወድገለብ ሄድወ። ወለጪፎት ለትከበተው “ፍሬተት ዐድ እሙ/እመ ወዐድ አቡሁ/ዐድ አቡሀ ትብቀል” ልብሎ። ወእለ ጪፎት ፍሬ ትትበሀል።

ቤት ሐራስ ቀደም እለ ምዕል እለ ሰብ ወመንደሊታት የአትወ፡ ምን እለ ምዕል እለ ወሐር ላቱ እግል ልእተው ጥሉቅቱ። ቅሎ ሖል ግርዝ ሖል ክም አትመመ እክል ማሼለ፡ ሽዒር ወሽንራይ ምስል ሓቡሮ ከቀሉ። ወእግለ ግርዝ እት ረአስ ዐረም ለበጡሮ ወሞረ ለጸቡጦ። እግል ወለት ሀዬ ርኮት ለጸቡጠ። ወገሌ ምን ለቅሎ እት ረአሱ ልክዑ። ለተርፈ ሀዬ እግል አግዋሮም ልሄድዎ። ወህቶም ልድሕሮ “ዐቦት ወጸሮት፡ ዕምር ጥዉል ወገድ ብዙሕ፡ ሽንጋሌከ ለርኤነ” እት ልብሎ። ወእሊ ቅሎ ሖሉቱ። ቅሎ ሖሉ እት ዓመት እገሌ ትከዐ ሀዬ ልብሎ እብ ዕምር እት ለሀድጎ።