ፈርሀት

ፈርሀት

እትለ እድንየ እብ ደማነት-ነፍስ በህለት፡ ለትወድዮም ሓጃት፡ ለትብሉ ከሊማት፡ ለተአመጽኡ ፍክር ወለትተለየ ገበይ ሜርሒት ሐያት ልግበእ መብዕድ ክሉ ሓጃት እብ ምራድከ፡ እምበል ፈርሀት ወጨቅት እግል ቲደዩ ቀዲር፡ ደማነት ነፍስ ልትበሀል። እለን ለሰሜናሀን ንቃጥ እብ እንትበህ ምን እንረኤ ህዬ፡ ምስል ዐውቴ ለሀለ እለን መትጻባጥ ዋዴሕ ቱ። ከምን እሊ እንዴ አትሌነ ምነ እሙር ክታብ: “The laws of success” ናይ ናፖልዮን ሂል ልትነሰአ ደማነት እት ነፍስ ወዐውቴ ለከስስ ክቱብ እግል ንቀደም እግልኩምቱ። አግደ አሳስ ወሰበብ ናይ ሕግላን ልግበእ መፈሸል ወገሀይ፡ ክመ እት ብዞሕ መናሰባት ለልትሸረሕ፡ ፈርሀት፡ ኢመትበጋስ፡ ዋጅብከ ኢወዲ፡ ኢመትዐጻም ወለመስሉ ክምቱ አኪድ ቱ። እግል እሊ ለሰሜናሁ መታክል እብ ሰብር ወመትሰባል እት ከድም ሐቆ ሐልፍካሁ ህዬ፡ አስክ ዐውቴ ለትነስእ ገበይ ጻብጥ ህሌከ እግል ልትበሀል ልትቀድር።
ደማነት-ነፍስ እት ዐውቴ ለህለ እለ ተአሲር ቅያስ አለቡ፡ ወእብ ደማነት እት ነፍሱ ለኢለሄርር ነፈር ህዬ፡ ምን ልትዐወትመ ዐውቴሁ ተርጀመት አለበ፡ ብዝሓም ልትካፎለ። ሰበት እሊ፡ ለአወለይ ምን ፈርሀት እግል ለአድሕነነ ለቀድር ሀለዮት ደማነት-ነፍስ ቱ። ፈርሀት ክሉ ወቅት፡ እት ደሚርነ ወምክነ እንዴ ገብአት አክለ ትበገስነ፡ እሊ እሉ ተሐስብ ህሌከ ኢትቀድሩ፡ ምን ጀርቤ ትፈርህ ህሌከ፡ አዳም ሚ እግል ሊበለካቱ፡ ምን ኢትትዐወት ህዬ ሚ እግል ትውዴቱ? ቅድረትመ ብከ ኢመስለኒ እት ትብል፡ ክሉ መሻክል እት ቀደምከ ክም ልትረኤ እንዴ ወዴት፡ ክለ ቅድረትከ እት በሕ ክም ትትበደል እንዴ አርኤተከ ክም ኢትትበግስ ወገበይ ዐውቴ ክም ኢተአትናውር ትወዴከ።
ፈርሀት፡ ናይ እድንየ፡ ለገደመት አባይ ተጠውር እት ገበእ፡ እብ ዕልምቱ ለትትባለሕ ምነ። ስስ አጅናስ ናይ ፈርሀት ህለው ወእግል ወድ አዳም እብ ቀየዶት፡ ምን ገበይ ዐቦት ወተጠውር ሐር ባልሳሙ ልትረከቦ። ህቶም ህዬ እሎም ተሉ ቶም፦
1. ፈርሀት ሕግላን
2. ፈርሀት እብር
3. ፈርሀት ሕሜት ወአዳም እግል ኢሊበለኒ
4. ፈርሀት ለትፈትዩ እግል ኢትሕገል
5. ፈርሀት ሕማም
6. ወፈርሀት ሞት
1. ፈርሀት ሕግላን፡ አሳስ ፈርሀትከ፡ ወለፈርሀት ምን ሚ ክም ትትበገስ ኣመሮት ሐቴ ምስዳር አስክ ዐውቴ ተ።
ደማነት እት ነፍስ ወዐውቴለአሳስ ፈርሀትከ እግል ኣመሮት ወሽርሐት ህዬ፡ ፈራሰት ወሐጠር ለሐዜ። ሐርመ ለከለጥከ ክም አሰአለውከ አው ኣመርከ እግል መትከባቱ፡ አማነት ወሐጠር ለአትሐዜ። እለ ፈርሀት እለ፡ ምነ እኩይ ጠባዬዕ ናይ አዳም፡ ለምንከ እብ እቅትሳድ ለልትደሀር ጨቂጥ ወእንዴ ደሀርከ ምን ርእየት ቱ ለልትበገስ። ሔዋናት እግል ልሕሰቦ ወምስምሰ እግል ለሀቦ ሰበት ኢቀድሮ፡ እግለ ምኖም ለለሐምቅ በልዕዎ ወቀቱሉ፡ ውላድ አዳም ላኪን ናይ ፍክር ወምስምሰ ሂበት መቅደረት ሰበት ቦም፡ እግለ ምኖም ለለሐምቅ ወእብ እቅትሳድ ለልትደሀር፡ እብ ተጃረቶም እግል ልምሎኩ ወልጭቆጡ ፈቱ ወለሐሩ። ክመ እንርእዩ ህዬ፡ እሊ ለእቱ ህሌነ ዘመን፡ ግሩሽ ለትትዐበድ እቱ ውቅት ጋብእ ሀለ። ዎሮ ነፈር ለሀለ እሉ አምር፡ እማነት፡ ደያነት ትግበእ መብዕድ እበ ኢከስስ፡ ማል ሐቆ አለቡ፡ ክምለ ኢነፌዕ ልትሐሰብ። ክም እሊ ፍክር እት ረአስከ ሐቆ ህለ ወአዳም ክምሰልሁቱ ለልርኤኒ እንዴ ትቤ ሐቆ አመንከ ህዬ፡ ክምለ ህሌካሀ ነቢርከ ለኢተርፍቱ። ወድ አዳም ሕግላን ክም ፈርህ አኪድ ቱ። ወፈርሀት ሐራም ኢኮን ላኪን፡ እብ መትዐጻም እት ከድም እግለ ረከብካሁ ርዝቅ እብ ፈርሐት ወለውቀት መትካፋል ምህም ቱ። አሳስ ፈርሀትከ እብ ኣመሮት፡ ምኑ ለትትባለሕ እበ ገበይ እንዴ ሳየርከ፡ አስክ ስለል ዐውቴ ሄረሮት ቱ ህዬ ለለአትሐዜ።
2. ፈርሀት አበሮት
እለ ፈርሀት እለ ክልኤ አሳስ በ፡ ለሐቴ ሰበት ይእንሸቄ፡ ክም አበርነ ሕግላን እግል ኢልሳድፈነ ወለ ካልአይት ህዬ፡ አስክለ ኢነአምረ ገበይ ሰበት እንሳፍር/እንገይስ ህሌናቱ። እሊ ህዬ፡ እተ ህሌናሁ ወቅት ምኒነ ለለአትሐዜ ሐቆ ሸቄነ፡ እብርመ ናዩ ለዘት ክምቡ፡ እግሉ ለገብእ እት ሸበትነ እንዴ አዳሌነ፡ ወኣማመ ለህሌነ ገበይመ፡ ሴፋሀ አዳሌነ እለ ምን ገብእ፡ ብዞሕ ለእንፈርህ እቡ ሰበብ ኢለሀሌ።
3. ፈርሀት አከይ-ዓፍየት
እለ ፈርሀት እለ ምን ክልቀት፡ ናቅስ ውላድ እግል ኢለሀሌ እከ ወምስል ዕቢነ እብ ሕማም እግል ኢትደመዕ ፈርህ ቱ። እትሊ፡ እግለ እት ሐንቴ መራቀበትከ ላቶም ሓጃት እት ሐኪም እንዴ ጊስከ፡ ዓፍየትከ እብ ራቀቦት፡ ርያደት ወለትመሳዌት ነብረ እብ መትመዋን እግል ትጋብሁ ትቀድር። ለተርፈ ህዬ፡ ሐቆ ምን መራቀበትከ በረ ገብአ፡ ኢመትሻቃል ወመትከባት ለአትሐዜ፡ ሰበቡ እትለ እድንየ፡ እንዴ ይእንቀይሩ እግል ንትከበቱ ለብነ ሓጃት ብዞሕ ሰበት ቱ።
4. ፈርሀት ለትፈትዩ እግል ኢትሕገል
እለ ፈርሀት እለ እግል ብዝሓም እብ ሕማም ቅንእ፡ እት ዕያዳት ምክ ክም ሰክቦ ዋድየት ህሌት። እተ ክምሰልሁመ እለ ፈርሀት እለ አብያት ፍርድ እብ ቅደይ፡ ራሐት ካልአቱ ህሌት። ወእተ ክም ወለፍ ለጸብጠቶም አንፋር ህዬ፡ እት ቀቲል ወደረር እት ነፍስ ለፈትዉ ነፈር ክም ለአጀሩ ትወድዮም። ሰበት እሊ፡ ለእንፈትዩ ነፈር፡ ናዩ ሕርየት ክምቡ፡ ወሕናመ እነ ለመስሎ ብዝሓም አንፋር ክም ህለው እንዴ ኣመርነ፡ ሐቆ ፍላን ይእነብር፡ ምስል ፍላን ሌጣተ ሐያቼ፡ ሐቆ ፍላን ከንዶእ እግል ኒበል አለብነ። ሰበቡ፡ እሎም ለእግሎም እንፈቴ አንፋር፡ ናዮም፡ ሕርየት፡ ዋጅብ ነቢር ወንየት ክም ቦም እግል ነኣምር ወጅብ።
5. ፈርሀት ሕሜት ወበሀል አዳም
እለ ፈርሀት እለ እግል አዳም ክም መሐልከ፡ ቅይድቱ ትትረከብ ወእት ብዞሕ መናሰባት ወእግል ትውደዩ ለብከ ከጥዋት፡ እብ ሰበብ ፈርሀት አዳም እግል ኢሊበልኒ፡ ሐር ቃብል ልትረከብ። እግል ነኣምረ ለብነ ምን ተሀሌ ወድ አድም ዲመ ልብል ወምን በሀል ግሱይ ኢለአምር። ሰኒመ ወክለ አ’መት ለአምነት እበ ሓጀት ምን ትሸቄ፡ ላዝም ድድከ ላቶም አንፋር ህለው። ሰበት እሊ፡ “እለ እወድየ ለህሌኮ ሓጀት ራትዐት ተ መኢኮን፡ ወእግል ብዕዳም ተአዜ መኢፋለ?” ሌጠ ኒበል ወምነን ንትሓፈዝ እንዲኢኮን፡ አዳም ላቱ አስክ ምን ሕሜት ወበሀል ልትገሴ ሐቆ ትጸበርነ፡ ሐቴ እንዴ ይእንሸቄ፡ ሰፈርነ ተሚሙ አኪድ ቱ። ለልቡሉ ህለው አማን ሐቆ ገብአ ህዬ፡ እብ መትሰባል ጌጋነ እንዴ ትከበትነ ከለጥነ ነአስኔ።
6. ፈርሀት ሞት
እለ ፈርሀት እለ፡ ምን ሰፈር አስክለ ኢነአምረ ገበይ፡ ወሐቆሁ ለሀለ፡ ለኢትአከደ ሓጃት ቱ ለትትበገስ። ብዞሕ ወእግል ንብለሱ ለይእንቀድር አስእለት ሰበት ጸብጥ ህዬ፡ ጨቅጥ ወሸቀላት ወዴ እትነ። አባይከ ኣመሮት፡ ክም ሰር ምኑ ለተዐወትከ እቱ ቱ። ሕናመ ክም ሸባብ እለ ለእግል ተጠውር ወዐቦት ገባይል ሐር ለትበልስ ፈርሀት፡ አሳሰ እብ ኣመሮት ወምነ እት ንትሓፈዝ፡ አስክ ዐቦት ንሄርር። እለን ለሰሜናሀን ሓጃት ምን ፍክርነ እብ አፍገሮት፡ ቀደም ለነአሳድር እቡ አብሳር ንባስር። ሰበቡ፡ እለን ሐቆ አሪምነ፡ ደማነት ነፍስ እንጠውር፡ ወድማነት ነፍስ ሐቆ ጠወርነ፡ ለስለልነ አስክ ዐውቴ ትጠፌሕ። ሀለዮት ገበይ ጣፍሐት ህዬ፡ ምስተቅበል ገቢል ወደውለት ለአበርህ። መባጼሕ ሻብ ህዬ ህቱቱ።