ራድዮ ሰእዮብ ሚ ዶል ተአሰሰ ወእግልሚ

ራድዮ ሰእዮብ ሚ ዶል ተአሰሰ ወእግልሚ
መሐጠት እዕላም ወኻሰተን ራድዮ እብ ትግራይት ለቀድም እግል ለሀሌ ለፍክረት ከደት ረያም ዋድየት ምንመ ዐለት፡ እሊ ኩሉ ሽቅል ማል ሰበት ጠልብ ንየት እት እንተ ሌጠ ታርፈት ዐለት። መሐጠት ተሌፍዝዮን አሰና ዲብ ሳምን ሐቴ ሳዐት እግል ትቀድሞ ትቀድሮ ለትብል ሰእየት ሰበት ሀቤነ እንዴ ኢንትአኽር እት ዮም 16 ኖቨምበር ሰነት 2018 እት ክል ጅምዐት ለልትቀደም በርናምጅ እግል ነአንብት ቀደርነ።

ሰእዮብ እግል ነአስስ ሰልፍ ለትጀመዐነ 8 ነፈር፡

1. ዑመር መሐመድ ዓሊ አቢብ፡
2. ዓድል ሳልሕ፡
3. ወሃብ ምከኤል፡
4. ደሳሌ በረኸት፡
5. ኸዲጃ ሙሳ፡
6. ሉላ መሐመድ ዓሊ፡
7. እንትሳር ዑመር፡
8. ናስር ዓሊ ጬዋይ፡
9. ሙናድል ዮውሃንስ ጸጋይ ምዲር መውቅዕ ስኒትና snitna.com ምን ሰነት 2020 ተሓበሬና ወአስክ እለ ምስል እት ኽድመት ሙጅተመዕና ህሌነ።

ሰእዮብ እግልሚ ተአሰሰት፡ ለትግራይት ልትሃጌ ሙጅተመዕ ኤረትርየ እብ ንሳሉ ለትነቅም ወእቡ ህቱ ሰኒ ለለአምረ ህግየ ለትትሃጌ፡ ኣኽባር ዐዱ ወመጺጸቱ ለሰምዕ ዲበ መሐጠት ራድዮ እግል ተህሌ እሉ ምን ተሐዘ ቱ። ዲብላ ስምሕት እግልና ለዐለት እብ አቅማር ስናዕየ አስክ ዳኽል ወጠን እግል ትብጸሕ ቀድር ለዐለት ክርና ህዬ ምን ዮም 16 ኖቨምበር ሰነት 2018 እት ከርስ ወጠን ወዲብ ሸርቅ ሱዳን ሰኒ እግል ትትሰመዕ አንበተት።

ዲብ ሰእዮብ ልትቀደም ለዐለ መዋድዕ ሚ መስል፡ ኣኽባር፡ ዘዐት ሰእዮብ፡ መስኡል ምን ቱ፧ ሞዳይ ሚቱ አኽባሩ፧ መዋድዕ ስያስየት ወእጅትማዕየት ትቀድም ዐለት። ዘዐት ሰእዮብ፡ ተዕሊቅ ስያሲ ዲብ ገብእ፡ ዲበ ለህሌነ ዲበ ሳምን ለጀረ ሐደስ አው ቀደም እለ ለገብአ ወለሐድገየ መደረት ለከስስ ልትናወል። መስኡል ምን ቱ፧ እሊ መስኡል ምን ቱ ለልብል በርናምጅ ለዲብ ኤረትርየ ለገብአ ጀራይም ካሰተን ሐቆ ሕርየት ለትሳጀነው መዋጥኒን ለልትናወል በርናምጅ ቱ። ሞዳይ ሚ ቱ አኽባሩ ለልብል በርናምጅ ህዬ ዲበ ህሌነ ዲበ ሳምን ለጀረ ሐደስ ዐቢ ለልትናወል ኸበር ወተሕሊል ቱ። መዋድዕ ስያስየት ወእጅትማዕየት ህዬ መቃበላት ወብዕድ ሸምል ዐለ። እብሊ ህዬ ሰእዮብ አስክ ወርሕ ፌብራይር ሰነት 2021 ምስል ቓነት አሰና እንዴ ዐለት ምን ወርሕ ማርስ እብ ብዙሕ አስባብ ምን አሰና አስክ ኤሪሳት ገዕዘት ወአስክ ዮም 31 ማዮ 2024 ምስል ኤሪሳት ጸንሐት ወእትሊ ወቅት እሊ እብ ብዙሕ አስባብ ራድዮ ሰእዮብ በርናምጅ ቀድም ይህለ።